نیول اکیڈمی میں کمیشننگ تقریب، ’پریڈ میں والد کا سر فخرسے بلند کرتی بیٹی‘

کراچی کی پاکستان نیول اکیڈمی میں منعقد ہونے والی کورس کمیشننگ پریڈ میں نیوی کی ایک خاتون آفیسر بھی شامل تھیں جنہوں نے نیوی میں تعینات اپنے باوردی والد کو سیلوٹ پیش کیا۔

اس پریڈ کے حوالے سے ایک ویڈیو کلپ سوشل میڈیا پر وائرل ہوا جس پر سوشل میڈیا صارفین خاتون اور ان کے والد کو سراہ رہے ہیں۔

ویڈیو کلپ شیئر کرتے ہوئے اظہر خان نے لکھا کہ ’باپ کی طرح کی بیٹی۔ گذشتہ روز پاکستان نیول اکیڈمی میں کمیشننگ تقریب میں اپنے والد کا سرفخرسے بلند کرتی ہوئی بیٹی۔‘
 

ویڈیو وائرل ہوئی تو اس خوبصورت لمحے کے بارے میں صارفین نے دلچسپ تبصرے کرتے ہوئے اپنے جذبات کا اظہارکیا۔

ٹوئٹر ہینڈل خالد لکھتے ہیں کہ ’دنیا میں اس سے بہتر احساس نہیں کہ ایک باپ اپنی بیٹی کو کامیاب ہوتا دیکھے۔‘

ویڈیو پر تبصرہ کرتے ہوئے ایک اور صارف ندیم نے لکھا کہ ’اس کا خاص طریقے سے قدم بڑھانا، اور باپ کے لیے بازو کھولنا۔ کیا ہی خوبصورت منظر ہے۔ بیٹیاں جب حد سے زیادہ خوش ہوں تو ایسے ہی چھوٹے چھوٹے اور خاص طریقے سے قدم اٹھاتی ہیں۔‘
 

باپ بیٹی کے درمیان اس لمحے کو بیان کرتے ہوئے ٹوئٹر ہینڈل فرمان خان نے لکھا کہ یہ محبت کا وہ انداز ہے جو صرف باپ بیٹی ہی سمجھ سکتے ہیں۔ اللہ تعالیٰ پیاری بیٹی کی عمر دراز کرے آمین۔‘
 

گذشتہ روز پاکستان نیول اکیڈمی میں 115 ویں مڈشپمین اور 23 ویں ایس ایس جی کی کورس کمیشننگ پریڈ منعقد ہوئی۔

چیئرمین جوائنٹ چیفس آف سٹاف جنرل ندیم رضا اس تقریب کے مہمان خصوصی تھے۔ اس کے ساتھ چیف آف نیول سٹاف محمد امجد خان نیازی بھی موجود تھے۔

اس پریڈ میں رائل سعودی نیول فورس اور بحرینی ڈیفینس فورسز کے مڈشپمین بھی موجود تھے۔ پریڈ کے دوران چیئرمین جوائنٹ چیفس آف سٹاف نے اعلیٰ کارکردگی دکھانے والے کیڈٹس کو ایوارڈز بھی دیے۔