سعودی منصوبے کے تحت یمن سے مزید 1352 بارودی سرنگیں صاف

یمن میں سعودی عرب کی جانب سے  بارودی سرنگیں صاف کرنے کے جاری منصوبے کے تحت اگست کے چوتھے ہفتے کے دوران 1352 بارودی سرنگیں صاف کی گئی ہیں۔

سعودی عرب کی سرکاری نیوز ایجنسی ایس پی اے کے مطابق  اعدادوشمار میں بتایا گیا ہے کہ  اس ہفتے صاف کی گئی بارودی سرنگوں میں 45 اینٹی پرسنل، 159 ٹینک شکن سرنگوں کے علاوہ 1147 جگہوں سے دھماکہ خیز مواد صاف کیا گیا ہے جب کہ بارود سے بھری ہوئی ایک ڈیوائس کو بھی ضائع کر دیا گیا ہے۔

یہ منصوبہ کنگ سلمان بن عبدالعزیز کی ہدایت پر سعودی عرب کی جانب سے یمن کےعوام کی مشکلات کو کم کرنے کے لیے جاری کیے گئے متعدد اقدامات میں سے ایک ہے۔

سعودی اور بین الاقوامی ماہرین کی نگرانی میں مارب، عدن، الجوف، شبوہ ، تعز ، حدیدہ ، لاہج ، صنعا، البیضا، الدھلے اور الصعدہ میں حوثی ملیشیا کی جانب سے نصب بارودی سرنگیں ہٹا ئی جا رہی ہیں۔

اس منصوبے کے آغاز سے اب تک مجموعی طور پر271،275 بارودی سرنگیں صاف کی جا چکی ہیں۔

حوثیوں کی جانب سے 1.2 ملین سے زائد بارودی سرنگیں بچھائی  گئی ہیں، جس  کے باعث سیکڑوں معصوم شہریوں کی جانیں ضائع ہو رہی ہیں۔

اس منصوبے کے تحت بارودی سرنگیں صاف کرنے والی 32 ٹیمیں یمنی شہریوں کی حفاظت کے لیے مختلف علاقوں میں کام کر رہی ہیں۔

یہ ٹیمیں اس بات کو یقینی بناتی ہیں کہ انتہائی محفوظ طریقے سے  فوری طور پر انسانی امداد کی فراہمی جاری رکھی جائے۔

اس منصوبے کے تحت مقامی انجینئرز کو  بارودی سرنگیں صاف کرنے کی تربیت بھی دی جا رہی ہے۔

انجینئرز اور کارکنان کو اس کام کے لیے جدید آلات فراہم کئے جاتے ہیں تا کہ وہ آسانی کے ساتھ  متاثرین کی مدد کرسکیں۔

اس منصوبے کو جاری رکھنے کے لیے حال میں معاہدے کی تجدید کی گئی ہے۔ 33.6 ملین ڈالر کا یہ نیا منصوبہ ایک سال کے لیے بڑھادیا گیا ہے۔

• سعودی عرب کی مزید خبروں کے لیے واٹس ایپ گروپ جوائن کریں