سیاحتی ادارے کورونا ضوابط کی پابندی کریں، وزارت سیاحت

 وزارت سیاحت کی تفتیشی ٹیموں نے کورونا ایس اوپیز پرعمل درآمد کو یقینی بنانے کے لیے فرنشڈ اپارٹمنٹس اور سیاحتی مقامات کے دورے شروع کردیئےہیں۔

سبق نیوز کے مطابق مملکت میں رواں ہفتے کے دوران کورونا کیسز میں ہونے والے اضافے کے باعث وزارت صحت نے احتیاطی تدابیر کے تحت ضوابط پرعمل درآمد کرنے کے احکامات صادر کیے ہیں۔

اس ضمن میں قانون نافذ کرنے والے اداروں کے علاوہ مختلف شعبوں کو بھی ہدایات جاری کی ہیں کہ وہ اپنے کارکنوں اور صارفین کو ایس اوپیز پرعمل کرنے کی تلقین کریں۔

کورونا ضوابط پرعمل درآمد  کویقینی بنانے کے لیے وزارت سیاحت کی جانب سے بھی مملکت کے تمام ریجنز میں تفتیشی ٹیموں کو فعال کیا جا چکا ہے۔

وزارت سیاحت کے ذرائع کا کہنا ہے کہ مملکت کے سیاحتی مقامات پران دنوں مقامی سیاحوں کی بڑی تعداد موجود ہوتی ہے۔

کورونا ایس اوپیز پرعمل درآمد کو یقینی بنانے کے لیے فرنشڈ اپارٹمنٹس اور ہوٹلز کی انتظامیہ کو ہدایت کی گئی ہے کہ انکے کارکن ماسک کی پابندی کریں اور سماجی فاصلے کے اصول پرعمل درآمد کویقینی بنایاجائے۔

دوسری جانب امور صحت کے نگران ادارے ’وقایہ‘ نے اپنی ویب سائٹ پرکورونا ایس اوپیز کے حوالے سے کہا کہ بند مقامات پرسماجی فاصلے کے اصول اور ماسک کی پابندی کی جائے علاوہ ازیں شادی ہالز اور سیاحتی مقامات کی انتظامیہ مقررہ ضوابط پر سختی سے عمل کریں تاکہ وبائی صورتحال کو بے قابو ہونے سے روکا جاسکے۔

اس ضمن میں وزارت سیاحت کا کہنا ہے کہ سیاحوں کی حفاظت اور انکی جانب سے شکایات کے لیے ٹول فری نمبر 930 مخصوص کیا گیا ہے جہاں کسی بھی قسم کی خلاف ورزی پرشکایت درج کرائی جاسکتی ہے