ایمیزون، نیٹ فلکس کا انوشکا شرما کی کمپنی سے معاہدہ

ایمیزون اور نیٹ فلکس نے تقریباً 4 ارب روپے مالیت کی فلموں اور ویب سیریز کو چلانے کے لیے انڈین پروڈکشن ہاؤس کلین سلیٹ فلمز کے ساتھ کام کرنے کا معاہدہ کیا ہے۔

این ڈی ٹی وی کے مطابق انڈیا کے شہر ممبئی میں واقع کلین سلیٹ فلمز پروڈکشن ہاؤس، نیٹ فلکس اور ایمیزون کے علاوہ آنے والے 18 ماہ میں دیگر ٹاپ سڑیمنگ ویب سائٹس پر بھی فلمیں اور ویب سیریز ریلیز کرے گا۔

یہ بات بالی وُڈ اداکارہ انوشکا شرما کے بھائی اورکلین سلیٹ فلمز کے شریک بانی کرنیش شرما نے بلوم برگ سے بات کرتے ہوئی بتائی۔

انہوں نے باقاعدہ اعلان کرنے سے پہلے فلموں کی مکمل فہرست فراہم نہیں کی۔

دوسری جانب نیٹ فلکس کے ترجمان نے اس بات کی تصدیق کہ وہ کلین سلیٹ فلمز کے ساتھ آنے والے دنوں میں تین پروڈکشنز پر کام شروع کریں گے، جبکہ ایمیزون نے فی الحال اس حوالے سے تبصرہ نہیں کیا۔

ان فلموں کی ریلیز اس بات کا ثبوت ہے کہ کورونا وائرس کی وجہ سے مالی رکاوٹوں اور دیگر وجوہات کی وجہ سے مختلف قسم کے نقصانات کا سامنا کرنے کے بعد اب فلم انڈسٹری بحالی کی جانب بڑھ رہی ہے۔

یاد رہے کورونا وائرس کی وجہ سے فلموں کی شوٹنگز کو بند کر دیا گیا تھا مگر گذشتہ چند ماہ میں کورونا ایس او پیز میں نرمی آنے کی وجہ سے انڈیا کے سنیما گھر اور تھیٹر دوبارہ کھل گئے ہیں جس سے انڈسٹری کے ترقی کے امکانات میں بھی اضافہ ہوا ہے۔

اس وبائی مرض کی وجہ سے دنیا بھر میں آن لائن تفریح  یعنی گھروں میں بیٹھ کر نیٹ فلکس اور ایمیزون جیسے دیگر پلیٹ فارمز پر سیریز اور فلمیں دیکھنے کے رجحان میں بھی اضافہ دیکھا گیا۔

ان اقدامات کی وجہ سے سٹریمنگ ویب سائٹس میں مواد کو محفوظ بنانے کی دوڑ کو مزید تیز کر دیا ہے جس سے کلین سلیٹ فلمز جیسے چھوٹے پلیٹ فارمز کو بھی فائدہ پہنچ رہا ہے،جس نے 2015 میں انڈیا میں غیرت کے نام پر قتل کے رواج سے متعلق فیچر فلماین ایچ 10  بنائی تھی، جس میں کرنیش شرما کی بہن انوشکا شرما نے کام کیا تھا۔

انڈیا میں تیزی سے مشہور ہونے والے آن لائن پلیٹ فارمز ایمیزون اور والٹ ڈزنی سے مارکیٹ واپس لینے کی کوشش کرتے ہوئے گذشتہ ماہ نیٹ فلکس نے انڈین صارفین کے لیے سبسکرپشن فیس میں 60 فیصد تک کی کمی کی۔

کلین سلیٹ فلمز اب نیٹ فلکس پر ’چکدا ایکسپریس‘ ریلیز کرنے کی تیاری کررہی ہے، جس میں انوشکا شرما ایک انڈین کرکٹر کا کردار ادا کریں گی جو دنیا کے فاسٹ بولرز میں سے ایک سمجھی جاتی ہیں۔ اس کے علاوہ تھرلر سیریز ’مائی‘ اور ڈراما فلم ’قلا‘ پر بھی کام جاری ہے۔