سرحدی امن قوانین کی خلاف ورزی پر 10 ہزار سے زیادہ شہریوں اور غیرملکیوں کے خلاف کارروائی
یہ کارروائی جنوری 2022 میں کی گئی۔ (فوٹو سبق)
محکمہ پاسپورٹ نے کہا ہے کہ اقامہ، ملازمت اور سرحدی امن قوانین کی خلاف ورزی کرنے والے 10 ہزار 295 سعودیوں اور مقیم غیرملکیوں کے خلاف قانونی کارروائی کی گئی۔ یہ کارروائی جمادی الثانی 1443ھ مطابق جنوری 2022 میں کی گئی۔
ایس پی اے کے مطابق محکمہ پاسپورٹ نے تمام سعودیوں اور مقیم غیرملکیوں کو تاکید کی کہ وہ اپنے کسی بھی ادارے میں غیر قانونی تارکین کو ملازمت نہ دیں۔ تمام سعودی اور غیرملکی غیر قانونی تارکین کو پناہ دینے، سفر کی سہولت فراہم کرنے اور رہائش سمیت کسی بھی قسم کا تعاون کرنے سے پرہیز کریں۔
محکمہ پاسپورٹ نے اپیل کی کہ جہاں جس کے علم میں بھی اقامہ، ملازمت اور سرحدی قانون کی خلاف ورزی کرنے والے آئیں وہ اس کی اطلاع مکہ مکرمہ اور ریاض ریجنوں میں 911 اور مملکت کے دیگر تمام علاقوں میں 999 پر دے دیں۔
محکمہ پاسپورٹ نے توجہ دلائی ہے کہ اقامہ، ملازمت اور سرحدی قوانین کی خلاف ورزی کرنے والوں کو قید، جرمانے کی سزا دی جاتی ہے۔ غیرملکی ہوتا ہے تو اسے بے دخل کردیا جاتا ہے۔
واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں
