جدہ سمیت ساحلی علاقوں میں تیز ہوا، اونچی موجیں اٹھیں گی

محکمہ موسمیات نے کہا ہے کہ آج جمعرات کو جدہ سمیت سعودی عرب کے مختلف علاقوں میں تیز ہوا چلے گی جس کے باعث سمندر میں اونچی موجیں اٹھیں گی۔

سبق ویب سائٹ کے مطابق محکمے نے کہا ہے کہ ’مکہ مکرمہ، مدینہ منورہ، ریاض، تبوک، شمالی حدود، الجوف، القصیم اور مشرقی ریجنوں میں ہوا میں تیزی محسوس کی جائے گی‘۔

محکمے نے کہا ہے کہ ’جدہ کے علاوہ تمام ساحلی علاقوں میں رات 8 بجے تک تیز ہوا کا امکان ہے جس کے باعث دھول مٹی اڑے گی اورحد نگاہ متاثر ہوگی‘۔

محکمے نے کہا ہے کہ ’اسی سے ملتی جلتی کیفیت مدینہ منورہ شہر کے علاوہ الحناکیہ اور الیتمہ میں ہوگی تاہم یہاں فضا گرد آلود رہے گی‘۔

’جبکہ بدر، ینبع اور الرایس کے ساحلی علاقوں میں تیز ہوا چلے گی جس کے باعث سمندر میں اونچی موجیں اٹھیں گی‘۔

دوسری طرف ماہر موسمیات ڈاکٹر عبد اللہ المسند نے کہا ہے کہ ’ریاض میں موسم اعتدال کی طرف مائل رہے گا‘۔

’فجر کے وقت کم سے سے کم درجہ حرارت 15 سینٹی گریڈ جبکہ دوپہر میں زیادہ سے زیادہ 30 سینٹی گریڈ ہوگی‘۔