عمرہ زائرین میں کوئی وبائی مرض نہیں،وزیرصحت

سعودی وزیرصحت کا کہنا ہے کہ مکہ مکرمہ آنے والے عمرہ زائرین کی صحت مجموعی طورپرتسلی بخش ہے۔ تاحال کسی بھی نوعیت کے وبائی امراض کی تصدیق نہیں ہوئی۔

سبق نیوز نے وزیر صحت فہد عبدالرحمن الجلاجل کی جانب سے جاری بیان کے حوالے سے مزید کہا ہے کہ سعودی حکومت کی اولین ترجیح عمرہ زائرین اور دیگر لوگوں کو بہترین صحت خدمات کی فراہمی کو یقینی بنانا ہے جس پرعمل کرتے ہوئے جامع منصوبہ بندی مرتب کی گئی ہے۔

عمرہ زائرین اورارض مقدس آنے والوں کی صحت وسلامتی کے لیے طبی عملہ ہمہ وقت موجود رہتا ہے۔ اس ضمن میں مکہ مکرمہ کے ہسپتالوں اورصحت مراکزکے علاوہ مسجد الحرام میں بھی زائرین کو بروقت طبی امداد فراہم کرنےکےلیے صحت مرکز کام کررہا ہے جہاں کسی بھی ہنگامی حالت سے نمٹنے کےلیے طبی عملہ ضروری ساز وسامان کے ساتھ ہمہ وقت موجود ہوتاہے۔

وزیر صحت نے مزید کہا وزارت نے عمرہ زائرین کی خدمت کے لیے 18 ہزار افراد کو متعین کیا ہے۔ رمضان المبارک کے ابتدائی دوعشروں کے دوران 7 ہزار 200 عمرہ زائرین کو طبی خدمات مہیا کی گئی جن میں 36 زائرین کو ہنگامی نوعیت کے آپریشن کی ضرورت تھی جبکہ گردوں کے امراض میں مبتلا 291 افراد کوڈائیلاسیس کی سہولت فراہم کی گئی علاوہ ازیں 20 اینجوپلاسٹی کے کیسز نمٹائے گئے