نیپال میں مسافر طیارے کے ملبے سے 14 لاشیں برآمد، مزید تلاش جاری

نیپال میں لاپتا ہونے والے طیارے کے ملبے سے 14 افراد کی لاشیں نکال لی گئی ہیں، جبکہ 22 میں سے باقی آٹھ افراد کی تلاش جاری ہے۔

سول ایوی ایشن کے ترجمان ڈیو چندرا لال کرن نے کہا کہ ’اب تک 14 لاشیں برآمد ہوئی ہیں اور باقی افراد کی تلاش جاری ہے۔ موسم بہت خراب تھا، لیکن ہم ایک ٹیم کو جائے حادثہ پر پہنچانے میں کامیاب ہو گئے۔‘

اس سے قبل پیر کی صبح حکام نے کہا تھا کہ مسافر طیارے کا ملبہ مل گیا ہے، لیکن اس میں سوار 22 افراد کے بارے میں ابھی کوئی اطلاع سامنے نہیں آئی ہے۔

 اے ایف پی کے مطابق نیپالی فوج کے ترجمان نریان سلوال نے کہا کہ ’ریسکیو عملے نے طیارہ کریش ہونے کی جگہ ڈھونڈ لی ہے اور ایک تصویر بھی بھیجی ہے۔‘

انہوں نے کہا کہ ’اضافی ٹیمیں موقع پر پہنچ رہی تاکہ ہم مزید تفصیلات اکٹھی کر سکیں۔‘

گزشتہ روز  اے ایف پی نے نیپال کی تارا ائیر لائنز کے حوالے سے بتایا تھا کہ یہ جہاز اتوار کی صبح دوران پرواز غائب ہوا۔

اس دو انجنوں والے ائیرکرافٹ نے صبح نو بج کر 55 منٹ پر نیپال کے مغربی قصبے پوکھارا سے اڑان بھری تھی لیکن جلد ہی اس کا ائیر ٹریفک کنٹرول سے رابطہ منقطع ہو گیا۔

تارا ائیر کے ترجمان سدھرشن بھرتولہ نے اے ایف پی کو بتایا کہ ’جومسوم اور پوکھارا کے درمیان پرواز کے دوران اس طیارے کا رابطہ منقطع ہوا۔‘

انہوں نے بتایا اس طیارے میں 19 مسافر جبکہ عملے کے تین ارکان موجود تھے۔

نیپال کی وزارت داخلہ کے ایک ترجمان پھانندرا مانی پوکھاریل نے بتایا کہ مسافر طیارے کی تلاش کے لیے دو ہیلی کاپٹر روانہ کر دیے گئے ہیں لیکن ان کے بقول ’حد نگاہ بہت کم ہے۔‘

’خراب موسم کی وجہ سے رسیکیو آپریشن متاثر ہو سکتا ہے کیونکہ اس صورت حال میں کچھ بھی دکھائی نہیں دیتا۔‘

خیال رہے کہ جومسوم کھٹمنڈو کے مغربی علاقے میں واقع کوہ ہمالیہ کا ایک معروف سیاحتی مقام ہے۔ یہ مقام پوکھارا سے 20 منٹ کی ہوائی مسافت پر واقع ہے۔