عارف نقوی کے بارے میں سوال، ’جواب نہیں دوں گا‘

سابق وزیراعظم اور پاکستان تحریکِ انصاف (پی ٹی آئی) کے چیئرمین عمران خان نے ابراج گروپ کے سربراہ عارف نقوی کے حوالے سے صحافی کے سوال پر جواب دینے سے انکار کر دیا۔

سماجی رابطوں کی ویب سائٹ ٹوئٹر پر نجی ٹی وی کے رپورٹر حیدر شیرازی نے ایک وڈیو ٹویٹ کی ہے جس میں سابق وزیر اعظم عمران خان ان پر سخت لہجے میں جواب دیتے دکھائی دیے۔

ویڈیو میں صحافی کو عمران خان سے عارف نقوی کے بارے میں سوال کرتے ہوئے سنا جاسکتا ہے کہ ’کیا عارف نقوی آپ کے بزنس پارٹنر بھی ہیں؟‘

جواب میں عمران خان نے کہا کہ ’بالکل تم دونوں کو جواب نہیں دوں گا، بالکل نہیں دوں گا جواب۔‘

اسی دوران ویڈیو میں دیکھا جاسکتا ہے کہ عمران خان کے گارڈ صحافیوں کو دھکے دے رہے رہیں جس کی شکایت صحافیوں نے بھی کی۔

سابق وزیر اعظم عمران خان کی جانب سے صحافیوں کے ساتھ ایسے رویے پر ویڈیو پر ٹوئٹر صارفین بھی تبصرہ کر رہے ہیں۔

شفیع داوڑ لکھتے ہیں کہ ’خود دار لیڈر ایسے سوالوں کے جواب نہیں دیتا۔‘

تحسین مصطفیٰ نامی ایک صارف نے لکھا ہے کہ ’آپ کو مزید ہمت اور حوصلہ ملے۔‘

عظمیٰ کاردار کہتی ہیں کہ ’اپنے حمایتی اینکرز اور اپنی مرضی کے سوالات ہوں تو پھر ٹھیک ہے۔‘