تحریک انصاف کا حکومت کو ایک ماہ میں اسمبلیاں تحلیل کرنے کا الٹی میٹم

پاکستان تحریک انصاف کے رہنما فواد چودھری نے حکومت کو ایک ماہ میں اسمبلیاں تحلیل کرنے کا الٹی میٹم دیتے ہوئے کہا ہے کہ ’الیکشن کے لیے مزید وقت نہیں دے سکتے، حکومت فوری انتخابات کا اعلان کرے۔‘

جمعے کو اسلام آباد میں پریس کانفرنس کرتے ہوئے فواد چودھری نے کہا کہ عمران خان اور تحریک انصاف کے خلاف الیکشن کمیشن کارروائیوں میں جلدبازی کر رہا ہے۔ ’الیکشن کمیشن ایک ایسا ادارہ بن چکا ہے جس کی غیرجانبداری ہی ختم ہو چکی ہے اس لیے ہم چیف الیکشن کمیشنر کے استعفے کا مطالبہ کر رہے ہیں۔‘

انہوں نے کہا کہ موجودہ حکومت کو انتخابات کے لیے بہت وقت دیا، حکومت ایک ماہ میں اسمبلیاں تحلیل کر کے انتخابات کا اعلان کرے۔‘

فواد چودھری نے بتایا کہ ’آئندہ 48 گھنٹے میں اسلام آباد میں بڑے جلسے کی تاریخ کا اعلان کریں گے۔ جلسے میں حکومت کو اسمبلیاں تحلیل کرنے کی ڈیڈلائن دیں گے۔‘

افغانستان میں امریکی ڈرون حملے میں القاعدہ کے سربراہ ایمن الظواہری کی ہلاکت کے حوالے سے انہوں نے کہا کہ ’حکومت کی طرف سے یہ وضاحت آنی چاہیے کہ پاکستان کی فضائی حدود استعمال ہوئی ہیں یا نہیں۔‘

فواد چودھری کے بقول افغانستان کے معاملے میں پاکستان نے بھاری قیمت ادا کی ہے۔ ’اس طرح کے حملوں میں پاکستان کی مدد ثابت ہوئی تو افغانستان سے تعلقات بگڑ جائیں گے۔ قوم کو اعتماد میں لیں، متعلقہ وزارت کو جواب دینا چاہیے۔‘