جدہ کے مزید دو علاقوں میں مکانات خالی کرنے کے نوٹس

سعودی عرب کے شہر جدہ کے غیرمنظم علاقوں کو مسمار کرنے کا سلسلہ جاری ہے۔  کمیٹی نے مزید دو علاقوں ام السلم اور کلو 14 کے رہائشیوں کو مکان خالی کرنے کے نوٹسز جاری کیے ہیں۔

سبق نیوز کے مطابق ان دونوں علاقوں میں عمارتیں گرانے کا عمل 15 اکتوبر سے شروع کیا جائے گا۔

علاقوں کو مسمار کرنے و دیگر امور کی نگران کمیٹی کی جانب سے کلو 14 اور ام السلم کے علاقوں میں رہائش پذیر شہریوں کو ہدایت کی گئی ہے کہ ’وہ نقل مکانی و دیگر امور کے لیے کمیٹی سے جلد رابطہ کریں تاکہ انہیں نقل مکانی کی سہولت کے ساتھ اشیائے خورنوش کی فراہمی کا بھی بندوبست کیا جا سکے۔‘

کمیٹی کا کہنا ہے کہ ’شہر کی تعمیر نو کے حوالے سے مجموعی طورپر 32 علاقوں میں سے 30 کومسمار کیا جا چکا ہے جبکہ کلو 14 اور ام السلم کے علاقے باقی ہیں، جہاں آئندہ ماہ کی 15 تاریخ سے انہدام کے کام کا آغاز کیا جائے گا۔‘

حکومتی امور کی متعلقہ کمیٹی کا کہنا تھا کہ ’مسمار کیے جانے والے علاقوں کے مکان مالکان اپنی لیز اور دیگر دستاویزات کمیٹی کی ویب سائٹ پر پی ڈی ایف فارمیٹ میں اپ لوڈ کریں تاکہ انہیں معاوضے کی ادائیگی کے حوالے سے کارروائی شروع کی جا سکے۔‘