سعودی عرب میں مکہ مکرمہ محکمہ ٹریفک کی عمارت میں بدھ کو لگنے والی محدود آگ پر شہری دفاع کے اہلکاروں نے قابو پالیا۔
عاجل ویب سائٹ کے مطابق محکمہ شہری دفاع نے ٹوئٹر پر بیان میں کہا کہ’ مکہ مکرمہ کے النسیم محلے میں واقع محکمہ ٹریفک کی عمارت میں بدھ کی صبح آگ لگ گئی‘۔
بیان کے مطابق ’اطلاع ملتے ہی امدادی ٹیمیں جائے وقوعہ پہنچ گئیں اور ریکارڈ وقت میں آگ پر قابو پالیا گیا۔ آتشزدگی سے کوئی جانی نقصان نہیں ہوا‘۔
شہری دفاع نے محکمہ ٹریفک کی عمارت میں لگنے والی آگ اور اسے بجھانے کی کوششوں کی فوٹیج جاری کی ہیں جن میں عمارت کی کئی کھڑکیوں کو توڑ کر آگ بجھاتے دیکھا جا سکتا ہے۔
