عازمین کی رہائشی گاہوں کے پرمٹ کا اجرا کس کی ذمہ داری؟

مکہ میونسپلٹی کے ترجمان اسامہ زیتونی نے کہا ہے کہ مکہ مکرمہ میں عازمین حج کی رہائش کے انتظامات کی ذمہ داری الاسکان کمیٹی کی ہوتی ہے۔ امسال 20 لاکھ عازمین کےلیے  کے لیے 4 ہزار سے زیادہ رہائشی پرمٹ جاری کیے جائیں گے۔ 

الوطن اخبار کے مطابق اسامہ زیتونی نے توجہ دلائی کہ مکہ مکرمہ میونسپلٹی عازمین حج کے لیے رہائشی پرمٹ کے اجرا اور حاجیوں کے لیے مختص کی جانے والی عمارتوں کی نگرانی کا کام ’اسکان الحجاج کمیٹی‘ کے ذمہ ہے۔

یہ کمیٹی 5 سرکاری اداروں کی نمائندہ ہے اس میں مکہ گورنریٹ، مکہ میونسپلٹی، وزارت حج، محکمہ شہری دفاع اورمکہ پولیس شامل ہیں۔ 

زیتونی نے توجہ دلائی کہ اسکان الحجاج کمیٹی اپنی ذمے داری 2 مراحل میں انجام دیتی ہے۔ پہلے مرحلے کا آغازمحرم کی یکم سے ہوتا ہے اور ماہ رجب کے آخر تک جاری رہتا ہے اس دوران ان عمارتوں کے بارے میں کارروائی کی جاتی ہے جہاں حجاج کی رہائش کے لیے پرمٹ جاری کیے جاتے ہیں۔  

دوسرے مرحلے کی شروعات ماہ ذوالقعدہ سے ہوتی ہے اور بارہویں مہینے ذو الحجہ کے آخر تک جاری رہتی ہے۔

اس مرحلے میں کمیٹی کی فیلڈ ٹیمیں حاجیوں کے لیے مختص عمارتوں کے دورے کرتی ہیں اس بات کااطمینان حاصل کیا جاتا ہے کہ آیا عمارتوں میں وہ تمام سہولیات مہیا ہیں جن کی بنیاد پر ان  کےمالکان کو حج رہائش پرمٹ جاری کیے گئے تھے۔ 

زیتونی کا کہنا ہے کہ مکہ میونسپلٹی نے انجینیئرنگ ان کنسلٹینسیوں کا تعین کردیا ہے جو حاجیوں کی رہائش کے لیے مجوزہ عمارتوں کے بارے میں رپورٹیں دیں گی۔

سعودی حکومت حاجیوں کے لیے مختص کی جانے والی عمارتوں کے بارے میں کچھ سٹینڈرڈ مقرر کیے ہوئے ہے انہی کی بنیاد پر انجینیئرنگ کنسلٹینسیاں مجوزہ عمارتوں کے حوالے سے رپورٹ دیتی ہیں۔ 

اسکان الحجاج کمیٹی کے سربراہ انجینیئرعبداللہ باجابر نے بتایا ہے کہ عمارتوں کے مالکان سے درخواستیں وصول کی جارہی ہیں اوران پرکارروائی ہورہی ہے۔  

باجابر نے توجہ دلائی کہ جو لوگ یہ دعوی کررہے ہیں کہ ہماری کمیٹی  کی ذمہ  داریاں وزارت سیاحت کو تفویض کردی گئی ہیں غلط ہیں کیونکہ اسکان الحجاج کمیٹی کا دائرہ  کار حج تک محدود ہے جبکہ وزارت سیاحت کے ماتحت الاسکان کمیٹی حج اور عمرہ دونوں سیزنوں میں رہائشی عمارتوں کے بارے میں اپنی ڈیوٹی دیتی ہے۔