12  ویں جماعت میں کم نمبر ہونے پر مالک مکان کا فلیٹ کرائے پر دینے سے انکار

انڈیا کے شہر بنگلور میں ایک عجیب واقعہ پیش آیا ہے جہاں 12 ویں کلاس میں نمبر کم ہونے پر مالک نے فلیٹ کرائے پر دینے سے انکار کر دیا ہے۔

سماجی رابطوں کی ویب سائٹ ٹوئٹر پر وٹس ایپ پر ہونے والی دلچسپ گفتگو کا سکرین شاٹ وائرل ہے جس میں فلیٹ کرائے پر لینے والے خواہشمند یوگیش نامی شخص کو مطلع کیا گیا ہے کہ فلیٹ کے مالک نے فلیٹ کرائے پر دینے سے اس وجہ سے انکار کر دیا ہے کہ ان کے 12 ویں جماعت میں نمبر کم تھے۔

شبھ نے اپنی ٹویٹ میں سکرین شاٹ شیئر کیے جس میں برجیش نامی بروکر یوگیش سے لنکڈ اِن پروفائل، ملازمت والی کمپنی کے سرٹیفیکیٹ کی کاپی، 10 ویں اور 12 ویں جماعت کی مارک شیٹ اور شناختی کارڈ کی کاپی طلب کرتا ہے۔

اس کے بعد اس کی جانب سے یوگیش کو ڈیڑھ سو سے دو سو الفاظ میں اپنے بارے میں لکھنے کا بھی کہا جاتا ہے۔

فلیٹ کرائے پر لینے کے خواہشمند یوگیش کی جانب سے یہ سب کچھ فراہم کر دیے جانے کے بعد اسے برجیش بری خبر سناتا ہے کہ ’سلام یوگیش، میں نے آپ کے کاغذات اور اپنے بارے میں لکھی گئی سٹوری مالک کو بھیجی ہے۔ معذرت، انہوں نے آپ کی پروفائل مسترد کر دی ہے، کیونکہ آپ نے 12 ویں جماعت میں 75 فیصد نمبر حاصل کیے تھے جبکہ مالک کو امید تھی کہ آپ کے 90 فیصد نمبر ہوں گے۔‘

اس ٹویٹ پر شبھ نے لکھا کہ ’مارکس آپ کے مستقبل کا فیصلہ کریں یا نہیں کریں لیکن یہ اِس کا فیصلہ ضرور کرتے ہیں کہ آپ کو بنگلور میں فلیٹ ملے گا یا نہیں ملے گا۔‘

اس بارے میں بقیہ ٹوئٹر صارفین کی جانب سے بھی بھی تبصرے دیکھنے میں آ رہے ہیں۔

ٹوئٹر ہینڈل دال مکھنی نے اپنی ٹویٹ میں لکھا کہ ’پاپا ٹھیک کہتے تھے کہ پڑھائی لکھائی کرو تب ہی گھر بنا پاؤ گے۔‘

چراغ نے مزاحیہ انداز میں کہا کہ ’صیحح بات ہے، میرے مالک مکان نے سختی سے مجھے کہا تھا کہ اگر سی جی پی اے 8.5 سے نیچے گیا تو سامان باندھ کر پہلی فرصت میں نکل جانا۔‘

ساؤربھ فرکے نے لکھا کہ ’بہت جلد بنگلور میں فلیٹ لینے کے لیے ہمیں انٹری امتحان دینا ہوگا۔‘

انشیکا تبصرہ کرتے ہوئے کہتی ہیں کہ ’اس حساب سے تو میں بے گھر ہو جاؤں گی اگلے سیمسٹر بنگلور میں فلیٹ ڈھونڈتے ہوئے۔‘

اویناش آہوجا نے مزاحیہ انداز میں ٹویٹ کی کہ ’بھائی صاحب شکر ہے میرا مالک مکان اَن پڑھ ہے۔ ورنہ میں تو بنگلو رمیں بے گھر ہو جاتا۔‘