’ریڈی، سیٹ، گو‘ بابر اعظم کی ہیوی بائیک چلانے کی ویڈیو وائرل

پاکستان کرکٹ ٹیم کے کپتان بابر اعظم کی سماجی رابطوں کی ویب سائٹ ٹوئٹر پر نئی ویڈیو وائرل ہے جس میں وہ ہیوی بائیک چلا رہے ہیں۔
بدھ کے روز بابر اعظم نے ٹویٹ میں ویڈیو اپلوڈ کی جس میں انہیں رات کے وقت ہیوی بائیک چلاتے ہوئے دیکھا جا سکتا ہے۔

بابر اعظم نیوزی لینڈ کے خلاف ون ڈے سیریز کے بعد آج کل آرام کر رہے ہیں اور اپنے گھر والوں کے ساتھ وقت گزار رہے ہیں۔
دوسری جانب قومی ٹیم کے فرائض کے علاوہ بابر اعظم رواں برس شیڈول سری لنکا کی ٹی20 لیگ لنکا پریمیئر لیگ (ایل پی ایل) میں بھی ایکشن میں نظر آئیں گے۔
ان کا معاہدہ بطور آئیکن پلیئر کولمبو سٹرائیکرز سے ہو گیا ہے۔
بابر اعظم کو لاہور کی سڑکوں پر ہیوی بائیک چلاتا دیکھ کر ٹوئٹر صارفین بھی اپنے خیالات کا اظہار کر رہے ہیں۔
عالیہ کہتی ہیں کہ ’دھُوم مچالے، سٹارنگ بابر اعظم دی بائیک رائیڈر۔‘

زوہیب نے اپنی ٹویٹ لکھا کہ ’کچھ نہیں صرف بابر اعظم ڈرائیو کر رہے ہیں، ایک بائیک۔‘

وِشال جیون نے تبصرہ کیا کہ ’دھُوم تھری کا عامر خان لگ رہا ہے۔ بوبی سپورٹس بائیک پر سٹائلش نظر آرہے ہیں۔‘

ٹوئٹر ہینڈل بابر اعظم کہتے ہیں کہ ’ملیے سب چیزوں کے ماہر بابر اعظم سے۔‘

پیام حیدر نے مزاحیہ انداز میں ٹویٹ میں لکھا کہ ’بابر اعظم انڈیا میں ورلڈ کپ اُٹھانے کے لیے رواں دواں ہیں۔‘

خالد منہاس نے قومی ٹیم کے کپتان کے لیے اپنے جذبات کا اظہار کرتے ہوئے کہا کہ ’آپ ہمارے لیے بہت اہم ہیں بھائی، براہ کرم بائیک نہ چلائیں۔‘