’لگتا ہے میاں صاحب کا انتخابات میں حصہ لینے کا فیصلہ،‘ نواز شریف کو ڈگری مل گئی

برطانیہ میں مقیم پاکستان کے سابق وزیر اعظم نواز شریف کی بی اے کی ڈگری گُم ہوگئی ہے جس کے بعد انہوں نے ڈُپلیکیٹ ڈگری کے حصول کے لیے پنجاب یونیورسٹی سے رابطہ کر لیا ہے۔

اردو نیوز کے نامہ نگار رائے شاہنواز کے مطابق نواز شریف نے ڈپلیکیٹ ڈگری کے حصول کے لیے فیس کا چالان بھی جمع کروا دیا ہے جو کہ 2 ہزار 990 روپے ہے۔

سابق وزیراعظم نواز شریف کی جانب سے جمع کروائے جانے والے فارم کے مطابق انہوں نے اپنی بی اے کی ڈگری 1968 میں مکمل کی اور انہوں نے امتحانات میں کُل 340 نمبرز حاصل کیے۔

سابق وزیراعظم نواز شریف کی ڈگری کے حصول کے حوالے سے ٹوئٹر پر بھی صارفین کے تبصرے دیکھنے میں آ رہے ہیں۔

الماس خان لکھتے ہیں کہ ’میاں نواز شریف کی گریجویشن کی ڈپلیکیٹ ڈگری کی درخواست سے لگتا ہے کہ میاں صاحب نے آئندہ عام انتخابات میں حصہ لینے کا فیصلہ کرلیا ہے۔‘

مرزا صاحب نامی صارف نے لکھا کہ ’میں نے بھی بی اے کر رکھا ہے۔ ہر بڑے آدمی کے پیچھے بی اے کی ڈگری ہی کیوں ہوتی ہے۔‘

تازہ ترین اطلاعات کے مطابق پنجاب یونیورسٹی کی جانب سے نواز شریف کو ڈپلیکیٹ ڈگری جاری کردی گئی ہے۔