حمزہ کا اعزاز: ’سکواش ہمارے گاؤں کو وراثت میں ملی ہے‘

آسٹریلیا کے شہر میلبرن میں مصر کے کھلاڑی محمد زکریا کو ہرا کر ورلڈ جونیئر سکواش چیمپیئن شپ جیتے والے حمزہ خان کا تعلق پشاور کے نواحی علاقے نوے کلے سے ہے۔

حمزہ خان کے ورلڈ ٹائٹل جیتنے کے بعد ان کے پورے گاؤں میں جشن کا سماں ہے اور ان کے گھر میں مبارک بادیں دینے کا سلسلہ جاری ہے۔

گاؤں کے باسی بہت خوش ہیں کیونکہ یہ ٹائٹل 37 سال بعد واپس اسی گاؤں کے پاس آیا ہے۔ نوے کلے کی زمین سکواش کے کھیل کے لیے نہایت زرخیز ہے جہاں سکواش کے سات عالمی چیمپیئن پیدا ہوئے جن میں محب اللہ، قمرزمان، جہانگیر خان، جان شیر خان اور ہاشم خان سمیت دیگر کھلاڑی شامل ہیں۔

حمزہ خان کی کامیابی پر ان کے چچا نعمت اللہ خوشی سے پھولے نہیں سما رہے۔ اردو نیوز سے گفتگو کرتے ہوئے انہوں نے بتایا کہ ’حمزہ کی جیت نے پورے گاؤں کا سر فخر سے بلند کر دیا ہے۔ یہ ٹائٹل 37 سال پہلے اسی علاقے کے بیٹے جان شیر کے پاس تھا اور آج دوبارہ یہ اعزاز ہمارے پاس آیا۔‘

نعمت اللہ کا کہنا تھا کہ ’سارے گاؤں اور محلے کے لوگ مبارکباد دینے کے لیے آ رہے ہیں۔ ہم بہت خوش ہیں۔ حمزہ خان کو سکواش سے عشق ہے، وہ سارا سارا دن پریکٹس کرتا رہتا تھا۔ ہمارے علاقے میں کھلاڑیوں کی کوئی کمی نہیں اگر ان کو سہولیات فراہم کی جائیں تو یقیناً ہر گھر سے حمزہ خان جیسا کھلاڑی پیدا ہوگا۔ حمزہ خان کے پاس مقابلوں کے لیے پیسے نہیں ہوتے تھے۔‘

ورلڈ جونیئر چیمپئن حمزہ خان کے کزن اسد خلیل کے مطابق ’حمزہ کے پاس سہولیات نہیں تھیں لیکن پھر بھی وہ ہمت نہیں ہارا، وہ بسوں اور رکشوں میں بیٹھ کر مقابلوں کے لیے جاتا تھا، باقی کھلاڑیوں کے مقابلے میں حمزہ کے پاس سہولیات نہ ہونے کے برابر تھیں۔‘

انہوں نے کہا کہ ’حمزہ خان کو یقین تھا کہ وہ یہ ٹائٹل اپنے نام کرے گا اور آج الحمد اللہ یہ خواب سچ ثابت ہوا۔‘

حمزہ خان کے کوچ نیاز زاہد گل نے اردو نیوز کو بتایا کہ اس چیمپیئن شپ کے لیے حمزہ نے بہت محنت کی تھی اور وہ اس سے پہلے 13 گولڈ میڈلز جیت چکا ہے۔

انہوں نے بتایا کہ برٹش جونیئر، یو ایس جونیئر اور دو مرتبہ ایشین چیمپئن شپ جیتی ہے۔ مجھے امید ہے کہ اب حمزہ ورلڈ اوپن کے لیے تیاری کرے گا۔‘

کوچ زاہد گل کے مطابق حمزہ نے چیمپیئن شپ کے لیے کوئٹہ میں پریکٹس کی تھی، اسے یقین تھا کہ وہ جیتے گا۔

ان کا مزید کہنا تھا کہ حمزہ کو پاکستان آرمی کی جانب سے مکمل تعاون حاصل رہا۔