انڈین ریاست ہریانہ میں ہندو مسلم فسادات، اداکار دھرمندر اور سونو سود بھی بول پڑے

انڈیا کی ریاست ہریانہ میں جاری ہندو مسلم فسادات پر بالی وُڈ کے اداکار دھرمندر اور سونو سود بھی بول پڑے ہیں۔

لیجنڈری اداکار دھرمندر نے ہریانہ کے ضلع نوح اور گروگرام (گڑگاؤں) میں جاری مذہبی فسادات پر اپنی ٹویٹ میں تشویش کا اظہار کیا، جبکہ سونو سود نے ایک شعر کے ذریعے عوام سے پُرامن رہنے کی اپیل کی۔

دھرمندر بدھ کے روز اپنی ٹویٹ میں کہتے ہیں کہ ’یہ قہر، کیوں، کس لیے؟ بخش دے مالک اب تو بخش دے، اب برداشت نہیں ہوتا۔‘

انہوں نے امن و بھائی چارے کی تمنا کا اظہار کرتے ہوئے اپنی دوسری ٹویٹ میں لکھا کہ ’اپنے وطن میں، تیری دنیا میں، مجھے امن، سکون، بھائی چارا چاہیے۔‘

دوسری جانب سونو سود نے اپنی ٹویٹ میں ہندی میں شعر لکھا جس کا ترجمہ کچھ یوں ہے۔

’نہ کسی کا گھر جلاؤ،

نہ کسی کی دکان جلاؤ،

انسانیت صرف مر رہی تھی،

انسان دیکھ رہے تھے۔‘

خیال رہے کہ ںوح میں مذہبی جماعت وشوا ہندو پریشاد (وی ایچ پی) کے مذہبی جلوس کے دوران ہونے والے تصادم میں چار افراد ہلاک ہوئے تھے جن میں دو چوکیدار، ایک راہگیر اور امام مسجد بھی شامل ہیں۔

نوح سے پھیلنے والے یہ فسادات گروگرام (گڑگاؤں) تک پہنچ چکے ہیں جس کے بعد منگل کی صبح نوح ضلع میں انتظامیہ نے کرفیو نافذ کر دیا تھا۔