کانگریس پارٹی کے رہنما کو مارچ میں دو سال قید کی سزا سنائی گئی تھی۔ فوٹو اے ایف پی
بھارتی وزیراعظم نریندر مودی پر تنقیدی سیاسی تبصروں پر ہتک عزت کی سزا سپریم کورٹ کی جانب سے معطل ہونے کے بعد مرکزی اپوزیشن لیڈر راہُل گاندھی کی پارلیمنٹ رکنیت بحال کر دی گئی ہے۔
اے ایف پی نیوز ایجنسی کے مطابق راہُل گاندھی ہند کے سب سے بڑے سیاسی خاندان کے فرد ہیں اور پارلیمنٹ میں ان کی بحالی کا کانگریس پارٹی کے دیگر اراکین نے خیرمقدم کیا ہے۔
راہُل گاندھی ہند کے سب سے بڑے سیاسی خاندان کے فرد ہیں۔ فوٹو اے پی
نریندر مودی کی بھارتیہ جنتا پارٹی (بی جے پی) کے دو بار اقتدار میں آنے سے قبل کانگریس پارٹی انڈیا کی حکمران جماعت رہی ہے۔
کانگریس پارٹی کے 53 سالہ رہنما کو مارچ میں ہتک عزت کے کیس میں دو سال قید کی سزا سنائی گئی تھی جسے ناقدین نے دنیا کی سب سے بڑی جمہوریت میں سیاسی اپوزیشن کو دبانے کی کوشش کے طور پر لیا تھا۔
انڈیا میں گذشتہ انتخابی مہم 2019 کے دوران کیے گئے ایک تبصرے میں راہُل گاندھی کو سزا ہوئی تھی جب انہوں نے سوالیہ انداز میں کہا کہ تمام چوروں کے پاس(ان کا) مشترکہ لقب مودی ہی کیوں ہے۔
واضح رہے کہ سزا ہونے کے نتیجے میں راہُل گاندھی کو مقننہ سے باہر کر دیا گیا تھا لیکن نئی دہلی میں سپریم کورٹ میں اپیل کرتے ہوئے وہ جیل سے باہر رہے۔
راہُل گاندھی کے حامی نوجوانوں نے ڈھول کی تھاپ پر رقص کیا اور نعرے لگائے۔ فوٹو اے پی
اس موقع پر کانگریس کے سربراہ ملک ارجن کھرگے نے سپریم کورٹ کے اس فیصلے کو خوش آئند قدم قرار دیتے ہوئے حکومت سے مطالبہ کیا کہ وہ اپوزیشن لیڈروں کو نشانہ بنا کر جمہوریت کو بدنام کرنے کے بجائے حکمرانی پر توجہ دے۔
کانگریس پارٹی کے رہنما اور رکن پارلیمنٹ ششی تھرور نے بھی راہُل گاندھی کی بحالی کا خیرمقدم کیا ہے۔
انہوں نے کہا کہ یہ انصاف اور جمہوریت کی جیت ہے اور گاندھی اب ملک کی عوام کی خدمت کے لیے لوک سبھا میں اپنے فرائض دوبارہ ادا کر سکتے ہیں۔
راہُل گاندھی اب لوک سبھا میں اپنے فرائض دوبارہ ادا کر سکتے ہیں۔ فوٹو روئٹرز
کانگریس کے بہت سے لیڈروں نے پیر کے حکم کا خیرمقدم کرتے ہوئے ویڈیو اور پیغامات پوسٹ کیے اور ارجن کھرگے نے اپوزیشن رہنماؤں میں مٹھائی تقسیم کی۔
نئی دہلی میں کانگریس ہیڈکوارٹر کے باہر پارٹی کے جھنڈے لہراتے ہوئے ڈھول کی تھاپ پر رقص کرنے والے حامی نوجوانوں نے راہُل گاندھی کی حمایت میں نعرے لگائے۔
