سکھر میں نامعلوم افراد کی فائرنگ سے صحافی جان محمد مہر قتل
جان محمد مہر سکھر میں سندھی زبان کے ٹی وی چینل کے ٹی این کے بیورو چیف تھے۔ (فوٹو: ٹوئٹر)
صوبہ سندھ کے شہر سکھر میں نامعلوم افراد کی فائرنگ سے نجی ٹی وی سے وابستہ صحافی جان محمد مہر جان سے گئے۔
پولیس کے مطابق صحافی جان محمد مہر پر آفس سے گھر جاتے ہوئے کوئنس روڈ پر فائرنگ کی گئی۔ فائرنگ کے نتیجے میں جان محمد شدید زخمی ہوگئے۔
جان محمد مہر کو تشویشناک حالت میں مقامی ہسپتال منتقل کر دیا گیا تاہم وہ دوران علاج دم توڑ گئے۔
خیال رہے جان محمد مہر سکھر میں سندھی زبان کے ٹی وی چینل کے ٹی این کے بیورو چیف تھے۔
جان محمد مہر سکھر پریس کلب کے صدر بھی رہ چکے تھے۔
دریں اثنا کراچی پریس کلب کے صدر اور سیکریٹری نے سکھر میں کے ٹی این کے بیورو چیف جان محمد مہر کی قاتلانہ حملے میں شہادت پر گہرے دکھ اور افسوس کا اظہار کیا ہے۔
اپنے بیان میں کراچی پریس کلب کے صدر سعید سربازی، سیکریٹری شعیب احمد اور اراکین مجلس عاملہ نے حکومت سے جان محمد کے قاتلوں کی فی الفور گرفتاری کا مطالبہ کیا۔
بیان میں کراچی پریس کلب کے عہدیداروں کا کہنا تھا کہ جان محمد مہر کا قتل سندھ حکومت اور سندھ پولیس کی ناکامی ہے۔
انہوں نے حکومت کو خبردار کیا کہ اگر جان محمد مہر کے قاتل فوری گرفتار نہ ہوئے تو بھرپور احتجاج کریں گے۔
