آزاد فلسطینی ریاست مشرق وسطی کے امن کےلیے اہم: سعودی وزیر خارجہ

نیو یارک میں عرب وزرائے خارجہ نے پیر کو مشرق وسطی امن عمل کی بحالی کی کوششوں کے حوالے سے تبادلہ خیال کے لیے خصوصی اجلاس کا انعقاد کیا ہے۔

سعودی وزیر خارجہ شہزادہ فیصل بن فرحان نے اجلاس کی صدارت کی۔ 

خبررساں ادارے ایس پی اے کے مطابق اجلاس میں عرب لیگ کے سیکریٹری جنرل ابو الغیط، اردن کے نائب وزیراعظم و وزیر خارجہ ایمن الصفدی، مصر کے وزیر خارجہ  سامح شکری،  یورپی یونین کے اعلی نمائندے برائے امور خارجہ شریک ہوئے۔ 

عرب وزرائے خارجہ اقوام متحدہ کی جنرل اسمبلی کے 78 ویں سیشن کے اجلاسوں میں شرکت کے لیے نیویارک میں ہیں۔ 

اجلاس میں ستر ممالک اور بین  الاقوامی تنظیم  کے نمائندے شریک ہیں۔ مختلف ملکوں سے پچاس عہدیداروں نے اجلاس سے خطاب کیا۔ 

مشرق وسطی امن عمل میں پیشرفت کے  لیے مشترکہ کوششوں میں ہم آہنگی کے طریقہ کار پر مباحثہ ہوا۔

علاوہ ازیں امن عمل کے احیا کی حوصلہ افزائی کے لیے اقدامات پر تبادلہ خیال کے لیے سیاسی، اقتصادی اور انسانی ورکنگ ٹیموں کی تشکیل کا معاملہ زیر بحث آیا۔ 

الاخباریہ کے مطابق سعودی وزیر خارجہ نے کہا ہے کہ’ آزاد فلسطینی ریاست کے بغیر فلسطین، اسرائیل تنازع کا کوئی حل نہیں ہے‘۔

اجلاس کے بعد ان کا کہنا تھا کہ ’ تنازع کے دو ریاستی حل کو سامنے آنا چاہیے‘۔

سعودی وزیر خارجہ نے کہ کہ’ اب ہم مقبوضہ علاقوں میں مسلسل اضافہ دیکھ رہے ہیں‘۔

انہوں نے بتایا اجلاس میں موجود ممالک نے مسئلے کے حل اور اسے حقیقت بنانے کی ضرورت پر حمایت کا اظہار کا ہے۔

اجلاس میں سعودی وزیر خارجہ کے دفتر کے ڈائریکٹر جنرل عبدالرحمن الداود اور مشیر دفتر خارجہ  ڈاکٹر منال رضوان نے بھی شرکت کی۔