فلپائن میں سعودی شہری مسلح افراد کی فائرنگ سے ہلاک، اہلیہ زخمی 

فلپائن کے علاقے داتو پیانگ میں مقیم سعودی شہری سلیمان جمال موٹر سائیکل سوار مسلح افراد کی فائرنگ سے ہلاک ہوگیا۔ ان کی اہلیہ بینوت زخمی ہے۔

عکاظ اخبار کے مطابق  ٹاون پولیس سربراہ نے بتایا کہ ’50 سالہ سعودی شہری اور اس کی 45 سالہ اہلیہ پر گھات لگا کر حملہ کیا گیا‘۔ 

پولیس سربراہ کا کہنا ہے ’سعودی شہری گولی لگنے سے موقع پر ہلاک ہوگیا جبکہ اہلیہ زخمی ہوئی ہے۔ انہیں علاج کے لیے ہسپتال میں داخل کرادیا گیا‘۔ 

سعودی جوڑے نے قریبی علاقے میں زرعی فارم خریدا تھا اور وہ اسے دیکھ کر  وائٹ فورڈ پک اپ میں گھر واپس جارہے تھے۔ 

 شریف اگواک میں ایک شاہراہ کے مصروف حصے میں ان پر حملہ کیا گیا۔

ابتدائی تحقیقات سے پتہ چلا ہے حملہ آوروں نے منصوبہ بندی سے حملہ کیا تاہم حملے کے محرکات حملہ آوروں کے بارے میں معلوم نہیں ہوسکا۔

علاقے کے میئر نے ایک بیان میں واقعہ کی مذمت کی انہوں نے پولیس کو مجرموں کی شناخت، گرفتاری اور قانونی کارروائی کی ہدایت کی ہے۔