’ٹائمڈ آؤٹ کے تحت آؤٹ سپورٹس مین سپرٹ کے خلاف‘

انڈیا میں جاری ورلڈ کپ کے 38 ویں میچ میں سری لنکن آل راؤنڈر اینجلو میتھیوز کے مقررہ تین منٹ میں وکٹ پر نہ پہنچنے  پر انہیں ’ٹائمڈ آؤٹ‘ کر دیا گیا۔ جس کے بعد بنگلہ دیشی کپتان کے اپیل کے فیصلے  پر سابق کرکٹرز سمیت کرکٹ شائقین اس وقعے کو محیر العقول قرار دیتے ہوئے ناخوش دکھائی دے رہے ہیں۔

پیر کو انڈیا کے دارالحکومت دہلی میں کھیلے گئے میچ میں بنگلہ دیش کرکٹ ٹیم کے کپتان شکیب الحسن نے سری لنکن آل راؤنڈر کے لیے ’ٹائمڈ آؤٹ‘ کی اپیل کی تھی۔

جس کے بعد امپائر اور گراؤنڈ میں موجود کھلاڑیوں میں طویل گفتگو کے بعد اینجلو میتھیوز بغیر کوئی گیند کھیلے پویلین لوٹ جاتے ہیں۔

 بنگلہ دیش کرکٹ ٹیم کے کپتان کی جانب سے کی جانے والی اپیل اور آؤٹ دینے کے معاملے پر انڈین کرکٹ ٹیم کے سابق کھلاڑی گوتم گمبھیر نے لکھا کہ ’آج دہلی میں جو ہوا وہ مضحکہ خیز تھا۔‘

اینجلو میتھیوز کرکٹ کی تاریخ کے ’ٹائمڈ آؤٹ میتھڈ‘ کے تحت آؤٹ ہونے والے پہلے کھلاڑی تو بنے لیکن شائقین اس انوکھے ریکارڈ سے ناخوش ہیں۔

ایکس (ٹوئٹر) یوزر طارق بگٹی نے لکھا کہ ’بنگلہ دیش والوں نے ویسے آج جو کیا وہ قوانین کا حصہ تو ہے مگر افسوس ہوا ان کے سپورٹس مین سپرٹ پر۔‘

انہوں نے مزید لکھا کہ ’انجیلو میتھیوز غلطی سے غلط ہیلمٹ پہن کر گراؤنڈ میں آئے جس پر انہیں یاد آیا تو دوسرے کھلاڑی نیا ہیلمٹ لے کر آئے جس پر بنگلہ دیش نے امپائر سے اپیل کی کہ یہ ٹائمڈ آؤٹ ہو گیا ہے۔‘

آسٹریلین کرکٹر عثمان خواجہ نے ’ٹائمڈ آؤٹ‘ کے معاملے پر کہا کہ ’انجیلو میتھیوز کریز پر آ گئے تھے پھر انہیں ہیلمٹ کی خرابی کے بارے میں پتہ چلا۔ یہ ٹائمڈ آؤٹ کیسے ہو سکتا ہے؟‘

سوشل میڈیا صارف رانا سمیر اس تاریخی لمحے پر افسوس کا اظہار کرتے ہوئے کہتے ہیں کہ ’ایک تاریخی لمحہ لیکن سپورٹس مین سپرٹ کے خلاف۔‘

انہوں نے مزید لکھا کہ ’ میتھیوز کو دو منٹ کے اندر کریز پر پہنچنا تھا لیکن وہ لیٹ پہنچے جس کی وجہ سے انہیں آوٹ قرار دے دیا گیا اور یہ کرکٹ کی 146 سالہ تاریخ میں پہلی بار ہوا ہے۔‘

ٹائمڈ آؤٹ کا قانون کیا ہے؟

قانون کے مطابق وکٹ گرنے کے بعد نئے بیٹسمین کو تین منٹ کے اندر وکٹ پر پہنچنا ہوتا ہے لیکن اینجلو میتھیوز ایسا کرنے میں ناکام رہے جس کی وجہ سے انہیں ٹائمڈ آؤٹ قرار دیا گیا۔  

ایم سی سی رول بُک کے مطابق بیٹسمین کو تین منٹ کے اندر وکٹ پر پہنچنا ہوتا ہے، اگر بیٹر ایسا کرنے میں ناکام رہے تو آنے والا بلے باز آؤٹ ہو جائے گا، ٹائم آؤٹ ہو جائے گا۔ 

میچ کے دوران بیٹنگ کے لیے باہر نکلتے ہی میتھیوز کے ہیلمٹ کا سٹریپ ٹوٹ گیا۔ جب وہ متبادل کا انتظار کر رہے تھے تو شکیب نے اپیل کر دی اور میتھیوز کو آؤٹ قرار دے دیا گیا۔ جب ایک بار شکیب الحسن نے فیصلے کو برقرار رکھنے کا فیصلہ کیا تو امپائر کچھ نہیں کر سکتے تھے۔ 

شکیب الحسن کے سدیرا سمارا وکرما کو آؤٹ کرنے کے بعد میتھیوز بیٹنگ کے لیے آئے تھے۔ سدیرا سمارا وکرما نے 42 گیندوں پر 41 رنز بنائے تھے۔