اینجلو میتھیوز کا ’ٹائم آؤٹ‘ راولپنڈی پولیس نے اشتہار میں بدل دیا

انڈیا میں جاری ورلڈ کپ کے ایک میچ میں اینجلو میتھیوز کے ہیلمٹ میں ہونے والی خرابی کے سبب ہونے والا ’ٹائم آؤٹ‘ کا تنازع پاکستان کے شہر راولپنڈی میں ٹریفک پولیس کے اشتہار میں تبدیل ہوگیا۔

خیال رہے پیر کو سری لنکا اور بنگلہ دیش کے درمیان میچ میں اینجلو میتھیوز کو کریز پر بیٹنگ کرنے آنے کے بعد دو منٹ کے اندر اپنی اننگز کی پہلی گیند کا سامنا نہ کرنے پر شکیب الحسن کی اپیل کے بعد ’ٹائم آؤٹ‘ قرار دے دیا گیا تھا۔

راولپنڈی ٹریفک پولیس نے اس معاملے کا استعمال کرتے ہوئے سوشل میڈیا پر ایک اشتہار شائع کیا جس میں اینجلو میتھیوز کو ہاتھ میں ٹوٹا ہوا ہیلمٹ پکڑے ہوئے دیکھا جا سکتا ہے۔

پولیس کی جانب سے سوشل میڈیا پر جاری پوسٹر میں یہ بھی لکھا تھا کہ ’ایل معیاری ہیلمٹ آپ کو ٹائم آؤٹ سے بچا سکتا ہے۔‘

ٹریفک پولیس نے اس اشتہار کے ساتھ شہریوں کو ایک بار پھر مطلع کیا کہ ’موٹر سائیکل سوار کے لیے ہیلمٹ ضروری ہی نہیں، لازمی بھی ہے۔‘

کرکٹ کے گراؤنڈ میں ہونے والے ایک واقعے کا سوشل میڈیا پر تخلیقی استعمال کرنے پر صارفین کی ایک بڑی تعداد پولیس کو سراہتی ہوئی نظر آ رہی ہے۔

صحافی و تجزیہ کار اجمل جامی نے ایک فیس بُک پوسٹ میں لکھا کہ ’سٹی ٹریفک پولیس راولپنڈی کے لیے اس شاہکار پر داد تو بنتی ہے ویسے۔‘

ایک اور سوشل میڈیا صارف نے پنجابی میں لکھا کہ ’ٹریفک پولیس راولپنڈی کا ایڈمن کوئی سیانا بندا ہے۔‘

نئی دہلی میں بنگلہ دیش کے ہاتھوں سری لنکا کی شکست کے بعد اینجلو میتھیوز کا کہنا تھا انہوں نے کچھ ’غلط‘ نہیں کیا اور میچ آفیشلز کو ’کامن سینس‘ کا مظاہرہ کرنا چاہیے تھا۔

آئی سی سی کے قوانین کے مطابق وکٹ گرنے کے بعد نئے آنے والے بیٹر کو دو منٹ کے اندر اپنی پہلی گیند کا سامنا کرنا پڑتا ہے اور ایسا نہ کرنے کی صورت میں اُسے ’ٹائم آؤٹ‘ قرار دے کر واپس پویلین واپس بھیجا جا سکتا ہے۔