ریاست کو دہشت گردی کیخلاف جنگ کا شرعی اور آئینی حق حاصل ہے: وزیراعظم کاکڑ

نگراں وزیراعظم انوار الحق کاکڑ نے کہا ہے کہ ریاست کو دہشت گردی کے خلاف جنگ کا شرعی اور آئینی حق حاصل ہے۔

پیر کو وزارت داخلہ میں شہدا کے لواحقین سے گفتگو کرتے ہوئے نگراں وزیراعظم  نے کہا کہ ’طاقت کا استعمال صرف ریاست کا حق ہے، ریاست اپنے عوام کو ہر صورت تحفظ فراہم کرے گی اور اس کے لیے کسی قربانی سے دریغ نہیں کیا جائے گا۔‘

’پوری قوم ہمیشہ شہدا کی قربانیوں کی مقروض رہے گی۔ زبان، رنگ، نسل، عقیدے سمیت کسی بھی بنیاد پر کسی بھی گروہ یا فرد کو پرتشدد کارروائیوں کی اجازت نہیں دی جا سکتی۔‘

وزیراعظم نے کہا کہ ملک و قوم  کے لیے قربانیاں دینے والے شہدا  کو پوری قوم خراج عقیدت پیش کرتی ہے، شہدا  کے لواحقین کے غم کا مداوا نہیں کیا جا سکتا۔

وزیراعظم نے کہا کہ پولیس، سیاستدانوں، صحافیوں، سول سوسائٹی، طلبا، افواج پاکستان سمیت معاشرے کے ہر شعبے سے تعلق رکھنے والوں نے ملک و قوم کے لیے قربانیاں دی ہیں۔

وزیراعظم نے کہا کہ طاقت کے استعمال کا حق صرف ریاست کو حاصل ہے،  زبان، رنگ، نسل، عقیدے سمیت کسی بھی بنیاد پر کسی بھی گروہ یا فرد کو پرتشدد کارروائیوں کی اجازت نہیں دی جا سکتی۔

’اگر کوئی گروہ تائب ہو کر رجوع کرنا چاہتا ہے تو سب سے پہلے وہ شہدا کے لواحقین سے معافی مانگے، اگر وہ مکمل طور پر اپنی غلطی قبول اور غیر مشروط سرنڈر کرے تو ریاست فیصلہ کر سکتی ہے، اگر ایسا نہیں تو ہم سو سال تک بھی لڑنے کے لیے تیار ہیں اور ریاست   ایسے لوگوں سے  بات چیت   نہیں  کرے گی۔‘

وزیراعظم نے کہا کہ ریاست اپنے عوام کو ہر صورت تحفظ فراہم کرے گی اور اس کیلئے کسی قربانی سے دریغ نہیں کیا جائے گا۔