ملائیشیا: سپین سے شکست، پاکستان جونیئر ہاکی ورلڈ کپ سے باہر

ملائشیا کے دارالحکومت کوالالمپور میں جاری جونیئر ہاکی ورلڈ کپ کے کوارٹر فائنل میں سپین نے پاکستان کو 2-4 سے ہرادیا۔

منگل کو جونیئر ہاکی ورلڈ کپ کے کوارٹر فائنل میچ میں سپین کی ٹیم نے پاکستان کو دو کے مقابلے میں چار گول سے شکست دے کر سیمی فائنل میں جگہ بنائی۔

کھیل کے پہلے ہاف 12 ویں منٹ میں پاکستان کے کپتان عبدالحنان شاہد نے فیلڈ گول سکور کرکے پاکستان کو ایک گول کی برتری دلادی جو پہلے ہاف کے اختتام تک برقرار رہی۔

کھیل کے دوسرے ہاف کے 37 ویں منٹ میں سپین کے پال، 38 ویں منٹ میں ایلیکس جبکہ 41 ویں منٹ میں پابلو نے گو کرکے اپنی ٹیم کو ایک کے مقابلے میں تین گول کی سبقت دلا دی۔

بعدازاں دوسرے ہاف کے 43 ویں منٹ میں پاکستان کے محمد سفیان خان نے پینلٹی کارنر کے ذریعے گول کردیا تاہم پال نے 45 ویں منٹ میں اپنا دوسرا گول سکور کرکے سپین کی برتری 2-4 کردی۔

اس طرح سپین نے پاکستان کے خلاف یہ میچ دو کے مقابلے میں چار گول سے جیت کر سیمی فائنل کے لیے کوالیفائی کر لیا۔

واضح رہے کہ عالمی رینکنگ میں سپین کا نمبر 6 ہے جبکہ پاکستان 12 ویں نمبر پر ہے۔ پاکستان نے 14 سال کے بعد جونیئر ہاکی ورلڈ کپ کے کوارٹر فائنل تک رسائی حاصل کی تھی۔