ایئرپورٹ سے سواری اٹھانے پر 648 افراد گرفتار

جنرل ٹرانسپورٹ اتھارٹی نے کہا ہے کہ ضوابط کی خلاف ورزی کرتے ہوئے ایئرپورٹ سے سواری اٹھانے پر 648 افراد کو گرفتار جبکہ 582 گاڑیاں ضبط کرلی گئی ہیں۔

سبق ویب سائٹ کے مطابق اتھارٹی نے کہا ہے کہ ’وزارت داخلہ کے تعاون سے یہ کارروائی 17 رمضان سے 23 رمضان کے درمیان کی گئی ہے‘۔

اتھارٹی نے واضح کیا ہے کہ ’اجازت نامے کے بغیر ایئرپورٹ سے سواریاں اٹھانے پر 5 ہزار ریال جرمانہ اور گاڑی ضبط ہوسکتی ہے‘۔

اتھارٹی نے کہا ہے کہ ’ایئرپورٹ سے ٹیکسی کی سہولت کی فراہمی کے لیے خصوصی ادارے قائم ہیں جن کے پاس یہ سروس فراہم کرنے کا اجازت نامہ ہے‘۔

’مسافروں کو ایئرپورٹ پر جگہ جگہ آگاہ کیا جاتا ہے کہ یہاں ٹرانسپورٹ کی کیا کیا سہولتیں موجود ہیں‘۔

واضح رہے کہ ایئرپورٹ سے مسافروں کو خصوصی لیموزین، ٹرین، بس اور رینٹ اے کار کی سہولت دستیاب ہے۔