کراچی میں ملکی تاریخ کا سب سے بڑا کنٹینر بردار بحری جہاز لنگرانداز

کراچی میں ملکی تاریخ میں اب تک کا سب سے بڑے کنٹینر بردار بحری جہاز لنگر انداز ہوا ہے۔

منگل کو ہچی سن پورٹس کی جانب سے جاری پریس ریلیز میں کہا گیا کہ یہ سنگ میل ٹرمینل کی جدید صلاحیتوں اور خطے میں سٹریٹیجک اہمیت کو اجاگر کرتا ہے۔

’کنٹینر بردار بحری جہاز (CV MSC ANNA ) دنیا کے سب سے بڑے بحری جہازوں میں سے ایک ہے جس کی لمبائی 400 میٹر ہے۔ اتنے بڑے بحری جہاز کی موثر طریقے سے ہینڈلنگ ہچی سن پورٹس کے بہترین آپریشنز کی ایک مثال ہے۔‘

مزید کہا گیا کہ ’ملک کے واحد گہرے پانی کے کنٹینر ٹرمینل کی حیثیت سے ہچی سن پورٹس پاکستان جدید ٹیکنالوجی اور انفرااسٹرکچر سے لیس ہے جو بہت بڑے کنٹینر بردار بحری جہازوں کی بے مثال مینجمنٹ کو یقینی بناتے ہیں۔‘

ہیڈ آف بزنس یونٹ ہچی سن پورٹس پاکستان سی ایس کم نے کہا کہ ’پاکستان کی تاریخ کے سب سے بڑے کنٹینر بردار بحری جہاز کی ہینڈلنگ ہچی سن پورٹس پاکستان کے لیے باعث فخر ہے اور پاکستان کی میری ٹائم انڈسٹری کی ترقی کے لیے ہمارے عزم کی ترجمانی کرتی ہے۔‘

سی ایس کم نے کہا کہ ’ہم باقاعدگی سے بڑے بحری جہاز ہینڈل کررہے ہیں۔  اس سے قبل 14ہزار ٹی ای یوز کے حامل 366میٹر طویل بحری جہاز کی ہینڈلنگ کی گئی تھی، اور اب اس جہاز کو ہینڈل کیا گیا جس کی گنجائش 19ہزار 368 ٹی ای یوز ہے، اور لمبائی 400 میٹر ہے۔ مستقبل میں بھی ہم بڑے بحری جہازوں کی موثر طریقے سے ہینڈلنگ کی اپنی صلاحیت کا مظاہرہ کرتے رہیں گے۔‘

پریس ریلیز میں مزید کہا گیا کہ ان بڑے بحری جہازوں کی آمد سے شپنگ کی لاگت کو کم کرنے میں مدد ملے گی۔ اس طرح کے بڑے بحری جہازوں کی ہینڈلنگ سے پورٹ کی سرگرمیوں اور تجارت میں اضافے سے حکومتی ریونیو میں بھی نمایاں اضافہ ہوگا۔ بڑے بحری جہازوں کی آمدورفت میں اضافہ عالمی تجارت میں پاکستان کے مقام کو بڑھانے کے ساتھ ملک کی معاشی ترقی میں ٹرمینل کی اہمیت کو اجاگر کرتا ہے۔