وراٹ کوہلی نے اپنے نئے عالیشان بنگلے کی جھلکیاں جاری کر دیں

انڈین کرکٹ ٹیم کے بیٹر وراٹ کوہلی نے اپنے نئے عالیشان بنگلے کی جھلکیاں جاری کر دی ہیں۔

وراٹ کوہلی نے علی باغ میں بنائے گئے اپنے عالیشان گھر کی جھلکیاں منگل کو فوٹو اینڈ ویڈیو شیئرنگ پلیٹ فارم انسٹاگرام پر ریلیز کیں۔

وراٹ کوہلی نے انسٹاگرام پر اپنی ویڈیو کے کیپشن میں لکھا کہ ’علی باغ میں میرے گھر کو بنانے کا سفر بہت شاندار رہا اور اس کو مکمل ہوتے دیکھ کر بہت عاجز محسوس کر رہا ہوں۔ اواس کی پوری ٹیم کو یہ گھر بنانے پر شکریہ۔ اس گھر میں اپنے پیاروں کے ساتھ وقت گزارنے کے لیے بے تاب ہوں۔‘

وراٹ کوہلی نے ویڈیو میں مزید بتایا کہ انہوں نے یہ گھر اس وجہ سے بنایا ہے کہ یہاں وہ اپنی پرائیویسی کو برقرار رکھ سکتے ہیں اور یہاں چھٹی منانے کے لیے موجود تمام آسائشیں ہیں۔

سپرسٹار بیٹر کے نئے گھرمیں شاندار انٹیریئر ڈیزائننگ کو دیکھا جا سکتا ہے جبکہ گھر میں ایک خوبصورت سوئمنگ پول بھی بنایا گیا ہے۔

انہوں نے مزید کہا کہ ’یہ بہت پُرسکون اور شاندار گھر ہے۔ اس جگہ آ کر آپ سکون محسوس کرتے ہیں اور کسی چیز کی فکر نہیں کرتے۔‘
 

خیال رہے کہ آئی سی سی ٹی20 ورلڈ کپ 2024 جیتنے کے بعد وراٹ کوہلی کرکٹ سے وقفہ لے رہے ہیں۔

بارباڈوس سے وطن واپس آنے کے بعد وراٹ کوہلی ٹیم کے ساتھ جشن میں مصروف رہے اور پھر تقاریب ختم ہونے کے بعد اپنی اہلیہ انوشکا شرما کے ساتھ لندن چلے گئے۔

واضح رہے کہ وراٹ کوہلی نے ٹی20 ورلڈ کپ کا فائنل جیتنے کے بعد اس فارمیٹ سے ریٹائرمنٹ لے لی تھی۔