سعودی وزیر سرمایہ کاری انجینیئر خالد الفالح نے کہا ہے کہ مملکت اور تھائی لینڈ کے تعلقات میں مسلسل پیشرفت ہورہی ہے۔ 2022 میں دونوں ملکوں کا تجارتی حجم 7.5 ارب ڈالر کا تھا جو 2023 میں بڑھ کر 9 ارب ڈالر تک پہنچ گیا۔
اخبار 24 کے مطابق انجینیئر خالد الفالح نے کہا کہ ٹریول اور ٹورازم میں بھی اضافہ ہوا ہے۔ گزشتہ سال 2 لاکھ سعودیوں نے تھائی لینڈ کا سفر کیا جبکہ 30 ہزار تھائی شہری مملکت پہنچے۔
سعودی وزارت سرمایہ کاری نے تھائی انویسٹمنٹ بورڈ اور مملکت میں تھائی سفارتخانے کے تعاون سے اتوار کو ریاض میں سعودی تھائی انویسٹمنٹ فورم کا انعقاد کیا۔
وزیر سرمایہ کاری انجینیئر خالد الفالح اور تھائی وزیر خارجہ، دونوں ملکوں کی بڑی کمپنیوں کے سی ای اوز اور نجی شعبے کے نمائندوں نے شرکت کی۔
ریاض میں تھائی لینڈ بورڈ آف انویسٹمنٹ (بی او آئی) کا دفتر قائم کیا گیا ہے تاکہ دونوں ملکوں کے درمیان اقتصادی تعلقات کو مضبوط اور تجارتی تبادلے کو وسعت دی جاسکے۔
فورم کے موقع پر مختلف شعبوں میں 11 معاہدوں اور مفاہمتی یادداشتوں پر دستخط بھی کیے گئے۔ جن میں زراعت، خوراک، سیاحت، انفراسٹریکچر اور توانائی میں تجارتی تعاون ، تجارتی اور سرمایہ کاری تعلقات کا فروغ شامل ہے۔
