گزشتہ ایک ہفتے کے دوران تعلیم پر 90 فیصد زیادہ اخراجات

سعودی عرب میں گزشتہ ایک ہفتے کے دوران تعلیم پر 444.7 ملین ریال خرچ کیے گئے  جو اس سے قبل کی مدت کے مقابلے میں 90 فیصد زیادہ ہے۔

اخبار 24 کے مطابق سعودی سینٹرل بینک ’ساما‘ نے 4 سے 10 اگست  2024 کے دوران مملکت میں رہنے والوں کے اخراجات کی رپورٹ جاری کی ہے جس کے مطابق گزشتہ ایک ہفتے کے  دوران یہاں رہنے والوں نے  13 ارب ریال کے اخراجات کیے  جو  اس سے قبل کے ہفتے کے مقابلے میں 11 فیصد کم ہیں۔

گزشتہ ایک ہفتے کے دوران ریستوران اور کیفے پر 1.9 ارب ریال، خوراک اور مشروبات پر 1.7 ارب ریال، مختلف اشیا اور خدمات پر 1.5 ارب ریال خرچ کیے گئے۔

ساما کا کہنا ہے کہ اسی عرصے کے دوران صارفین نے  کپڑوں اور جوتوں پر 871  ملین ریال، تعمیراتی سامان پر  334.2 ملین ریال، الیکٹرانک آلات پر 203.4 ملین ریال، گیس سٹیشنوں پر 873 ملین  ریال اور صحت کے حوالے سے 766.3 ملین ریال خرچ کیے۔

ساما کی رپورٹ کے مطابق فرنیچر پر 283.5 ملین ریال، ہوٹلوں پر 317.7 ملین ریال، تفریح و ثقافت پر 284.6 ملین ریال، مواصلات پر 106.8 ملین ریال، ٹرانسپورٹیشن پر 751 ملین ریال اور دیگر اخراجات پر 2.2 ارب ریال خرچ کیے گئے۔

ساما نے اپنی رپورٹ میں بتایا ہے کہ گزشتہ ایک ہفتے کے دوران سب سے زیادہ اخراجات کرنے والوں میں ریاض کے شہری سرفہرست رہے جنہوں نے 4.33 ارب ریال خرچ کیے۔ دوسرے نمبر پر جدہ کے شہری رہے جنہوں نے ایک ہفتے کے دوران 1.85 ارب ریال کے اخراجات کیے۔

رپورٹ کے مطابق دمام کے شہری 630.36 ملین ریال کے ساتھ تیسرے، مکہ مکرمہ 545.42 ملین ریال کے ساتھ چوتھے اور پانچویں نمبر پر مدینہ منورہ کے شہری رہے جنہوں نے 520.81 ملین ریال کے اخراجات گزشتہ ایک ہفتے میں کیے۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں