رونالڈو نے تین دن میں یوٹیوب سے کتنے ملین ڈالر کما لیے؟

النصر فٹبال کلب کے کپتان اور سٹار فٹ بالر کرسٹیانو رونالڈو اپنا یوٹیوب چینل لانچ کرتے ہی متعدد ریکارڈز بنا چکے ہیں۔

پرتگالی لیجنڈ فٹ بالر نے 21 اگست کو اپنے یوٹیوب چینل پر ویڈیو اپلوڈنگ کا آغاز کرتے ہوئے چینل کو باقاعدہ لانچ کیا تھا، جبکہ انہوں نے 8 جولائی کو یوٹیوب جوائن کیا تھا۔ 

39 سالہ فٹبالر کے یوٹیوب چینل ’UR Cristiano‘ پر نظر دوڑائی جائے تو وہ معلوم ہوتا ہے کہ وہ تین دن میں 12 ویڈیوز اپ لوڈ کر چکے ہیں جن پر مجموعی طور پر کروڑوں ویوز آئے ہیں۔

جہاں رونالڈو نے تین دن میں 3 کروڑ 20 لاکھ سے زائد سبسکرائبرز حاصل کر کے ’سوشل میڈیا انگیجمنٹ‘ کی نئی حدیں مقرر کردی ہیں وہیں ان کے مداح قیاس آرائی کر رہے ہیں ہے کہ ان کو چینل پر حاصل ہونے والے ویوز پر کتنی رقم موصول ہو رہی ہوگی؟

ڈیجیٹل میڈیا کے ماہرین کے مطابق ویسے تو یوٹیوب ویڈیو کا بہترین دورانیہ 10 منٹ کا تصور کیا جاتا ہے مگر رونالڈو کے چینل پر زیادہ تر ویڈیوز 3 منٹ سے بھی کم دورانیے کی ہیں جن میں 3 ویڈٰیوز پر انہوں نے دو کروڑ سے بھی زائد ویوز حاصل کیے ہیں۔

تھنکی فِیک کی ایک تحقیق کے مطابق یوٹیوب چینلز ایک ہزار ویوز پر عام طور پر چھ امریکی ڈالر تک کما سکتے ہیں جبکہ 10 لاکھ ویوز پر ملنے والی رقم  12 سو سے چھ ہزار امریکی ڈالرز تک ہو سکتی ہے۔

رونالڈو کے چینل کی تفصیلات سے ان کے ویوز کا اندازہ کیا جائے تو ان کے ویوز کی تعداد 12 کروڑ 10 لاکھ سے بھی زیادہ بنتی ہے۔ اگر حساب کیا جائے تو یوٹیوب کے ویوز اور ممکنہ سپانسرشپس سے رونالڈو نے اب تک کئی سو ملین ڈالر کما لیے ہیں۔ 

یوٹیوبرز کی کمائی اور ویوز کا اندازہ لگانے کے لیے بہت سی تھرڈ پارٹی ویب سائٹس اور پیڈ سروسز بھی انٹرنیٹ پر موجود ہیں لیکن یہ سب اعداد و شمار اندازے کے تحت جاری کیے جاتے ہیں۔

واضح رہے کرسٹیانو رونالڈو نے پہلے 12 گھنٹے میں اپنے یوٹیوب چینل پر ایک کروڑ سبسکرائبرز حاصل کر کے معروف یوٹیوبر مسٹر بیسٹ کا ریکارڈ توڑا تھا۔

مسٹر بیسٹ 311 ملین سبسکرائبرز کے ساتھ دنیا کے سب سے زیادہ فالو کیے جانے والے یوٹیوبر ہیں اور انہوں نے اپنے 10 ملین سبسکرائبرز 132 دن میں حاصل کیے تھے۔

اس سے قبل رونالڈو نے یوٹیوب کا ایک اور ریکارڈ بھی قائم کیا تھا، ای ایس پی این یوکے کے مطابق رونالڈو کا یوٹیوب چینل پہلے 90 منٹ میں ایک ملین سبسکرائبرز حاصل کرنے والا دنیا کا پہلا چینل ہے۔

رونالڈو پہلے ہی سوشل میڈیا کے مختلف پلیٹ فارمز پر 917 ملین سے زائد فالوورز کے ساتھ دنیا کے مقبول ترین فٹ بالرہیں جس کی بدولت وہ پیڈ سپانسپرشپس کے لحاظ سے دنیا کے مہنگے ترین ایتھلیٹ تصور کیے جاتے ہیں۔