لائیو: گلگت میں باراتیوں سے بھری کوسٹر حادثے کا شکار، دو افراد ہلاک اور 22 لاپتہ
گلگت سے چکوال جانے والی باراتیوں سے بھری ایک کوسٹر حادثے کا شکار ہو گئی جس کے نتیجے میں دو افراد ہلاک اور 22 لاپتہ ہیں۔
ریسکیو 1122 کے مطابق مسافر کوسٹر تھلیچی کے مقام پر دریا برد ہوئی ہے۔ حادثے کے نتیجے میں 22 افراد لاپتا، جبکہ ایک لڑکی زخمی ہوئی ہے اور دو لاشوں کو نکال لیا گیا ہے۔
صدر مملکت آصف علی زرداری نے گلگت میں کوسٹر کے حادثے پر اظہار افسوس کیا ہے اور امدادی کارروائیاں تیز کرنے کی ضرورت پر زور دیا ہے۔
جیل کے باہر حراست میں لیے گئے پی ٹی آئی رہنما رہا
راولپنڈی میں اڈیالہ جیل کے باہر سے تحریک انصاف کے متعدد رہنماؤں کو پولیس نے حراست میں لیا تھا جنہیں اب رہا کر دیا گیا ہے۔
پولیس کی جانب سے حراست میں لیے گئے رہنماؤں میں عمر ایوب ،اسد قیصر ، شبلی فراز، صاحبزادہ حامد رضا اور اپوزیشن لیڈر پنجاب اسمبلی احمد خان بھچر شامل تھے۔
حراست میں لیے گئے تمام افراد کو اڈیالہ چوکی میں شفٹ کر دیا گیا تھا۔ پی ٹی آئی رہنما عمران خان سے ملاقات کے لیے اڈیالہ جیل پہنچے تھے۔
پی ٹی آئی نے ان رہنماؤں کی حراست کی تصدیق کرتے ہوئے کہا تھا کہ اس حوالے سے باضابطہ بیان جاری کیا جائے گا۔
سموگ میں اضافے کے باعث پنجاب کے متعدد اضلاع میں تعلیمی ادارے بند رکھنے کا فیصلہ
پاکستان کے صوبہ پنجاب میں سموگ کی صورتحال کے پیش نظر متعدد اضلاع میں تعلیمی اداروں کو بند رکھنے کا فیصلہ کیا گیا ہے۔
منگل کو پنجاب حکومت کی جانب سے جاری کیے گئے بیان کے مطابق لاہور اور ملتان کے بعد راولپنڈی سمیت دیگر ڈویژنز میں بھی سکول اور کالجز کو 17 نومبر تک بند رکھنے کا فیصلہ کیا گیا۔
اس حوالے سے ڈائریکٹر جنرل انوائرمنٹ پروٹیکشن ایجنسی نے نوٹیفکیشن جاری کیا ہے۔
راولپنڈی سمیت منتخب ڈویژنز میں 12ویں کلاس تک تمام اسکولوں اور کالجز کو 13 نومبر سے 17 نومبر تک کے لیے بند رکھا جائے گا۔
نوٹیفکیشن کے تحت بندش کا اطلاق راولپنڈی، ڈیرہ غازی خان، بہاولپور، ساہیوال، اور سرگودھا ڈویژن پر ہوگا۔
لاہور سمیت دیگر ڈویژنز میں تعلیمی اداروں کی بندش کے جو نوٹیفکیشن پہلے جاری کیے گئے اُن پر عملدرآمد جاری رکھا جائے گا۔
پنجاب حکومت کے محکمہ تعلیم نے کہا ہے کہ سکول اور کالجز بندش کے دوران آن لائن کلاسز کا اجراء جاری رکھ سکیں گے۔
شہری بغیر ضرورت کے گھر سے نہ نکلیں: ڈی جی ماحولیات
لاہور کے بعد پنجاب کے دیگر اضلاع میں پنک آئی، چیسٹ انفیکشن اور مختلف اقسام کی الرجی کے مریضوں کی تعدادمیں اضافہ دیکھا جا رہا ہے۔
فضا میں سموگ کی آلودگی کے بڑھنے کے پیش نظر ڈی جی خان، ساہیوال، سرگودھا، بہاولپور اور راولپنڈی ڈویژن میں تعلیمی ادارے بند کرنے کے فیصلے کے بعد صوبے کے ڈائریکٹر جنرل برائے ماحولیات نے شہریوں سے اپیل کی ہے کہ وہ بغیر ضرورت کے گھروں سے نہ نکلیں۔
حکام نے کہا ہے کہ 17 نومبر تک نجی ٹیوشن سینٹرز بھی بند رکھے جائیں گے۔
