سعودی ولی عہد شہزادہ محمد بن سلمان سے وزیراعظم شہباز شریف کی ملاقات

سعودی ولی عہد شہزادہ محمد بن سلمان سے منگل کو ریاض میں ’ون واٹر سمٹ‘ کے موقع پر پاکستان کے وزیراعظم شہباز شریف نے ملاقات کی ہے۔

ایس پی اے کے مطابق ملاقات میں پاک، سعودی تعلقات کے پہلووں، دوطرفہ تعاون اور اسے فروغ دینے کے طریقوں کاجائزہ لیا گیا۔

حالیہ علاقائی اور بین الاقوامی صورتحال اور اس حوالے سے کی جانے والی کوششوں کے ساتھ متعدد امور خاص طور پر پانی کے چیلنجوں سے نمنٹے کی کوششوں پر تبادلہ خیال کیا گیا۔

اس موقع پر وزیر توانائی شہزادہ عبدالعزیز بن سلمان، وزیر خارجہ شہزادہ فیصل بن فرحان، وزیر سرمایہ کاری انجینیئرخالد الفالح، ایوان شاہی کے مشیر محمد التجویری، جنرل انٹیلی جنس کے سربراہ خالد الحمیدان اور پاکستان میں سعودی سفیر نواف المالکی موجود تھے۔

پرائم منسٹر آفس پاکستان کے پریس ونگ سے جاری بیان کے مطابق سعودی ولی عہد اور وزیر اعظم شہباز شریف کے درمیان گزشتہ چھ ماہ کے دوران پانچویں ملاقات ہے۔  

بیان کے مطابق دونوں رہنماؤں کا اس بات پر اتفاق ہوا کہ پاکستان اور سعودیہ کے لیے اپنے اقتصادی، تجارتی اور سرمایہ کاری کے تعلقات کو مزید فروغ دینا انتہائی ضروری ہے۔

 دونوں رہنماؤں نے پاکستان میں سرمایہ کاری کے حوالے سے سعودی مفاہمتی یادداشتوں اور معاہدوں پر عملدرآمد کی رفتار پر اطمینان کا اظہار کیا۔ 

 وزیراعظم شہباز شریف نے ولی عہد کا پاکستانی عوام کے لیے نیک خواہشات پر شکریہ ادا کیا۔

 انہوں نے ولی عہد کو جلد از جلد پاکستان کا دورہ کرنے کی اپنی دعوت کا اعادہ کیا۔ 

وزیراعظم شہباز شریف نے آفیشل ایکس اکاونٹ پر لکھا ریاض میں ون واٹر سمٹ کے موقع پر اپنے بھائی ولی عہد شہزادہ محمد بن سلمان سے ملاقات کی۔

ہم نے اپنے مضبوط برادرانہ تعلقات کا اعادہ کیا، تجارت اور سرمایہ کاری میں اپنے تعاون کو مزید بڑھانے کے طریقوں پر تبادلہ خیال کیا۔

’ پاکستان اور سعودی عرب کے درمیان باقاعدگی سے اعلیٰ سطح کے تبادلوں سے دونوں ممالک کے درمیان باہمی فائدے مند اقتصادی تعاون کی راہ ہموار ہو رہی ہے۔‘

ہمارے عوام کے فائدے کے لیے سعودی عرب اور پاکستان کے قریبی تعلقات کی تعمیر میں سعودی ولی عہد کی ذاتی دلچسپی اور سپورٹ کے لیے شکر گزار ہوں۔