سعودی وزیر داخلہ شہزادہ عبدالعزیز بن سعود بن نائف سے محسن نقوی کی ملاقات

سعودی عرب کے وزیر داخلہ شہزادہ عبدالعزیز بن سعود بن نائف سے پاکستان کے وزیر داخلہ محسن نقوی نے ملاقات کی ہے۔

منگل کو وزارت داخلہ کی جانب سے جاری پریس ریلیز میں بتایا گیا ہے کہ یہ ملاقات ریاض میں وزارت داخلہ کے ہیڈکوارٹر میں ہوئی، شہزادہ عبدالعزیز بن سعود بن نائف نے محسن نقوی اور وفد میں شامل دیگر ارکان کا استقبال کیا۔

دونوں وزرائے داخلہ نے پاکستان اور سعودی عرب کے سکیورٹی کے حوالے سے تعاون پر تبادلہ خیال کیا۔

شہزادہ عبدالعزیز بن سعود بن نائف اور محسن نقوی نے منشیات سمگلنگ سے نمٹنے کے اقدامات اور باہمی دلچسپی کے دیگر امور پر بھی گفتگو کی۔

اس موقع پر انسداد منشیات کے حوالے سے باہمی تعاون کو مزید بڑھانے پر بھی بات چیت ہوئی۔

ملاقات کے دوران محسن نقوی کا کہنا تھا کہ ’سعودی عرب سے ہر پاکستانی کا مذہبی عقیدت و احترام کا رشتہ ہے اور سعودی عرب نے ہر مشکل وقت میں ہمیشہ پاکستان کا ساتھ دیا ہے۔‘

انہوں نے سعودی عرب کی ویژنری قیادت اور عوام کے لیے نیک خواہشات کا اظہار کرتے ہوئے کہا کہ ’بے پایاں سپورٹ پر سعودری عرب کا شکریہ ادا کرتے ہیں‘

ملاقات میں سعودی عرب کے نائب وزیر داخلہ ناصر الداؤد، وزارت داخلہ کے انڈر سیکریٹری ڈاکٹر خالد الباطل، پبلک سکیورٹی کے ڈائریکٹر لیفٹیننٹ جنرل محمد البسامی، ڈرگ کنٹرول کے ڈائریکٹر جنرل میجر جنرل محمد القرنی بھی موجود تھے۔