انڈیا: والدہ کے کینسر کے علاج کے لیے جمع رقم جوئے میں ہارنے پر نوجوان کی خودکشی

انڈیا کے شہر چنئی میں افسوس ناک واقعہ پیش آیا ہے جہاں والدہ کے کینسر کے علاج کے لیے جمع رقم سے جوا کھیلنے والے نوجوان نے خودکشی کر لی۔

ہندوستان ٹائمز کے مطابق 26 برس کے نوجوان نے والدہ اور بھائی سے ڈانٹ کھانے کے بعد خودکشی کی۔

خودکشی کرنے والے نوجوان نے اپنی والدہ کے کینسر کے لیے جمع رقم سے آن لائن جوا کھیلا جس کے بعد والدہ اور بھائی نے اسے ڈانٹ پلائی۔

رپورٹ کے مطابق اس نوجوان کا تعلق چنئی کے چِنامالائی علاقے سے تھا جہاں وہ فوڈ بزنس میں کام کرتا تھا۔

نوجوان کے والد کی موت آٹھ برس قبل ہوئی جس کے بعد وہ اپنی والدہ اور بھائی کے ساتھ رہتا تھا۔

ٹائمز آف انڈیا کے مطابق خودکشی کرنے والا نوجوان جمعے کے روز لاپتہ ہوا جس کے بعد سنیچر کی صبح اُس کی لاش برآمد ہوئی۔

اس نوجوان نے کورونا وائرس کی وبا کے دنوں میں آن لائن گیمز کھیلنا شروع کیں جس کے بعد اسے گیمز کی لت لگ گئی۔

گیمز کی لت اتنی سنگین ہوتی گئی کہ نوجوان نے اپنی والدہ کے کینسر کے علاج لیے جمع 30 ہزار روپے چوری کیے اور پیسوں کو جوے پر لگا دیے۔

جمعے کے روز والدہ اور بھائی نے نوجوان کو آن لائن گیمز اور جوا کھیلنے پر ڈانٹا جس کے بعد اس نے دلبرداشتہ ہو کر تار کی مدد سے کمرے کی چھت سے پھندا لگا کر خودکشی کر لی۔