صوبہ بلوچستان میں پولیو کا ایک اور کیس، رواں سال کیسز کی تعداد 65 ہو گئی

پاکستان کے صوبہ بلوچستان سے پولیو وائرس کا ایک نیا کیس سامنے آیا ہے جس کے بعد رواں سال رپورٹ ہونے والے کیسز کی مجموعی تعداد 65 ہو گئی ہے۔

منگل کو انسداد پولیو کے لیے کام کرنے والے نیشنل ایمرجنسی آپریشن سینٹر کی جانب سے جاری بیان کے مطابق  پولیو کا نیا کیس بلوچستان کے ضلع قلعہ عبداللہ میں سامنے آیا ہے۔

رواں سال کے دوران قلعہ عبداللہ سے رپورٹ ہونے والا یہ پولیو کا ساتواں کیس ہے۔

ہمسایہ ملک افغانستان اور پاکستان دنیا کے واحد ممالک ہیں جہاں پولیو کے وائرس کا مکمل خاتمہ نہیں ہو سکا۔

نیشنل ایمرجنسی سینٹر کا کہنا ہے کہ رواں سال پولیو وائرس کے کُل 65 کیسز رپورٹ ہوئے ہیں جن میں سے 27 صوبہ بلوچستان سے، 18 خیبر پختونخوا، 18 سندھ اور ایک ایک کیس صوبہ پنجاب اور دارالحکومت اسلام آباد میں سامنے آیا ہے۔

بلوچستان میں پولیو مہم کا آغاز 30 دسمبر سے ہونا ہے جس کے تحت تمام 36 اضلاع  میں بچوں کو قطرے پلائیں جائیں گے۔

بلوچستان میں انسداد پولیو مہم تین مرتبہ مؤخر ہو چکی ہے۔ 

سات روزہ مہم شروع کرنے کے لیے 16 دسمبر کی تاریخ مقرر کی گئی تھی تاہم سکیورٹی خدشات کی بنا پر مؤخر کر دی گئی

خیال رہے کہ پاکستان میں سنہ 1990 کی دہائی کے دوران تقریباً 20 ہزار کیسز سالانہ رپورٹ ہوتے تھے تاہم 2018 میں یہ تعداد کم ہو کر 8 رہ گئی تھی۔ سال 2023 میں پولیو کے 6 کیسز رپورٹ ہوئے تھے جبکہ 2021 میں پولیو کا صرف ایک کیس رپورٹ ہوا تھا۔