لائیو: بنگلہ دیش کا پاکستانی جے ایف۔17 تھنڈر میں خصوصی دلچسپی کا اظہار

اہم نکات:

• بلوچستان میں ینگ ڈاکٹروں کا احتجاج

• ’کنٹری پارٹنرشپ فریم ورک‘ کے تحت پاکستان کو 20 ارب ڈالر

• سپریم کورٹ اور انسداد دہشتگردی کی عدالت میں مقدمات کی سماعت

• چیف الیکشن کمشنر کے تقرر کے لیے پارلیمانی کمیٹی جلد تشکیل دی جائے، اپوزیشن کا خط

• لاہور میں موٹر سائیکل اور سائیکلوں کے لیے علیحدہ سڑک کی تعمیر

بنگلہ دیشی فوج کے پرنسپل سٹاف آفیسر کا پاکستانی جے ایف۔ 17 تھنڈر میں خصوصی دلچسپی کا اظہار

بنگلہ دیش کے اعلیٰ سطح کے دفاعی وفد نے بنگلہ دیش کی آرمڈ فورسز ڈویژن کے پرنسپل سٹاف آفیسر لیفٹننٹ جنرل ایس ایم قمر الاسلام کی سربراہی میں پاکستان کی فضائی فوج کے سربراہ ایئر مارشل ظہیر احمد بابر سے ملاقات کی۔

فوج کے شعبہ تعلقات عامہ کی جانب سے جاری کردہ بیان کے مطابق ملاقات میں ایئر چیف نے دونوں ممالک کی فضائی افواج کے درمیان فوجی شراکت داری کو مشترکہ ٹریننگ کے پروگرامات کے ذریعے فروغ دینے کے عزم کا اعادہ کیا۔

جنرل قمر الاسلام نے پاکستان فضائیہ کے منصوبوں، جدید ٹیکنالوجی اور ملک کے اندر تیار کیے گئے ٹیکنالوجیکل فریم ورک کی تعریف کی۔

جنرل قمر الاسلام نے پاکسان کے ڈیویلپ کردہ نفیس ملٹری ہارڑویئر بالخصوص جے ایف ۔17 تھنڈر جنگی طیاروں میں خصوصی دلچسپی کا اظہار کیا۔

اس ملاقات میں دونوں ممالک کے درمیان فوجی شراکت داری اور تعاون کو فروغ دینے پر زور دیا گیا۔

کراچی میں بجلی کے صارفین سے 30 ارب روپے انکم ٹیکس کی وصولی

کراچی اور اس کے مضافاتی علاقوں میں بجلی فراہم کرنے والی کمپنی ’کے الیکٹرک‘ کی جانب سے بجلی بلوں پر لیے جانے والے ٹیکسوں کی تفصیلات قومی اسمبلی میں پیش کرتے ہوئے بتایا گیا ہے کہ انکم ٹیکس کی مد میں 30 ارب روپے وصول کیے گئے۔

وزارت توانائی نے قومی اسمبلی کو بتایا کہ کے الیکٹرک نے صارفین سے 8 مختلف قسم کے ٹیکسز وصول کیے جانے کا اعتراف کیا ہے۔

دستاویزات کے مطابق کے الیکٹرک صارفین سے گزشتہ ایک سال کے دوران نارمل جی ایس ٹی کی مد میں 102 ارب 43 کروڑ روپے وصول کیے گئے جبکہ صارفین نے انکم ٹیکس کی مد میں 30 ارب 26 کروڑ روپے ادا کیے۔ 

دوسری جانب وزارت توانائی نے 2024 میں بجلی چوری سے متعلق تفصیلات قومی اسمبلی میں پیش کرتے ہوئے بتایا کہ گزشتہ سال 12 ارب 48 کروڑ 50 لاکھ روپے کی بجلی چوری کی گئی۔

پاور ڈویژن کی جانب سے ایوان کو بتایا گیا کہ بجلی چور صارفین سے 5 ارب 83 کروڑ وصول کر لیے گئے، جبکہ بجلی چوری پر 2 لاکھ 16 ہزار ایف آئی آرز کا اندراج کیا گیا۔

دوسرے صوبے ہماری سکیموں کو نقل کرتے ہیں، مریم نواز

پنجاب کی وزیراعلٰی مریم نواز نے کہا ہے کہ دوسرے صوبے اُن کے کاموں کے بعد ویسی سکیمیں شروع کرتے ہیں۔

بدھ کو سیالکوٹ میں لیپ ٹاپ تقسیم کرنے کی تقریب سے خطاب میں ان کا کہنا تھا کہ ’دوسرے صوبے ہم سے سکیم مانگتے ہیں کہ وہاں بھی شروع کرنی ہے۔‘

مریم نواز نے کہا کہ انہوں نے کبھی کسی دوسرے صوبے پر لشکر کشی کی بات کی اور نہ ایسا سوچا۔

’سول نافرمانی اور آئی ایم ایف کو قرضہ نہ دینے کے لیے کبھی نہیں کہہ سکتی۔ کبھی نہیں کہوں گی باہر نکلو، آگ لگاؤ۔‘

پاکستان میں الیکٹرک گاڑیوں کے چارجنگ سٹیشنز کے لیے بجلی کی قیمت میں کمی

پاکستان میں حکومت نے الیکٹرک گاڑیوں کے چارجنگ سٹیشنز کے لیے بجلی کی قیمت میں 44 فیصد رعایتی ٹیرف کا اعلان کیا ہے۔

بدھ کو پاور ڈویژن کی جانب سے جاری کیے اعلامیے میں کہا گیا ہے کہ موجودہ فی یونٹ 71روپے اب چارجنگ سٹیشنز کو 39.70روپے فی یونٹ ملے گا۔

الیکٹریکل وہیکلز کے فروغ پر حکومتی پالیسی کے اجلاس کی صدارت کرتے ہوئے وزیراعظم شہباز شریف نے کہا کہ ’ماحولیاتی آلودگی کو کم کرنے کے لیے ایک اچھا اقدام ہے جس کا خیرمقدم کرتے ہیں۔‘

آئی ٹی واحد شعبہ جس نے تجارتی سرپلس ظاہر کیا، وزیر مملکت 

سینیٹ اجلاس کے دوران وزیر مملکت برائے انفارمیشن ٹیکنالوجی شزہ فاطمہ خواجہ نے کہا ہے کہ پاکستان جلد دنیا کی سب سے بڑی انٹرنیٹ کیبل سے منسلک ہو جائے گا۔

 انہوں نے بتایا کہ پاکستان ٹیلی کمیونیکیشن اتھارٹی (پی ٹی اے) نے ملک میں انٹرنیٹ کی سپیڈ کو بہتر بنانے کے لیے دو سال میں اپنی فریکوئنسی کو دوگنا کیا ہے۔  پانچ ماہ کے دوران آئی ٹی ایکسپورٹس میں 33 فیصد اضافہ ہوا ہے، جو کہ ایک اہم سنگ میل ہے۔

انہوں نے اس صنعت کو واحد شعبہ قرار دیا جس نے تجارتی سرپلس بھی ظاہر کیا ہے۔

وزیراعظم شہباز شریف کا ورلڈ بینک کی جانب سے 20 ارب ڈالر کی پارٹنرشپ کا خیرمقدم

وزیراعظم شہباز شریف نے ورلڈ بینک کی جانب سے دس سالہ ’کنٹری پارٹنرشپ فریم ورک‘ کے تحت پاکستان کو 20 ارب ڈالر دینے کے وعدے کا خیرمقدم کیا ہے۔

بدھ کو وزیراعظم نے ایکس پر ایک پوسٹ میں لکھا کہ ’بچوں کی غذائیت، معیاری تعلیم، صاف توانائی، ماحولیات کی بہتری، جامع ترقی اور نجی سرمایہ کاری سمیت چھ اہم شعبوں پر توجہ مرکوز کرتے ہوئے ’کنٹری پارٹنرشپ فریم ورک‘ ہماری قومی ترجیحات کی عکاسی کرتا ہے، اور یہ ہمارے معاشی ٹرانسفارمیشن منصوبے کے مطابق ہے۔‘

وزیراعظم نے لکھا کہ ’میں جنرل عاصم منیر اور اپنے ساتھیوں کی کاوشوں کا دل کی گہرائیوں سے معترف ہوں جنہوں نے اس طرح کی تبدیلی کی شراکت داری میں پاکستان کی بنیاد کو مضبوط بنانے کے لیے دن رات کام کیا۔‘

شہباز شریف نے کہا کہ کنٹری پارٹنرشپ فریم ورک پاکستان کی اقتصادی لچک اور صلاحیت پر عالمی بینک کے اعتماد کی عکاسی کرتا ہے۔ ’ہم اپنے لوگوں کے لیے پائیدار مواقع پیدا کرنے کے لیے اپنی کوششوں کو ہم آہنگ کرتے ہوئے اس شراکت کو مضبوط بنانے کے منتظر ہیں۔‘

چیف الیکشن کمشنر کے تقرر کے لیے پارلیمانی کمیٹی جلد تشکیل دی جائے، اپوزیشن کا خط

پاکستان کی قومی اسمبلی میں اپوزیشن لیڈر عمر ایوب نے سپیکر اور سینیٹ میں اپوزیشن لیڈر شبلی فراز نے چیئرمین کو خطوط لکھ کر نئے چیف الیکشن کمشنر کے تقرر کے لیے پارلیمانی کمیٹی تشکیل دینے کی درخواست کی ہے۔

خطوط میں مطالبہ کیا گیا ہے کہ جلد پارلیمانی کمیٹی تشکیل دے کر ایک غیرجانبدار شخص کو تعینات کیا جائے تاکہ الیکشن میں شفافیت پیدا کی جا سکے۔

خط میں عمر ایوب نے کہا ہے کہ سکندر سلطان راجہ کی مدت 26 جنوری کو ختم ہو رہی ہے۔

لاہور میں موٹر سائیکل اور سائیکلوں کے لیے علیحدہ سڑک کی تعمیر

رائے شاہنواز، اردو نیوز ۔ لاہور

پنجاب کے دارالحکومت لاہور موٹر سائیکلوں اور سائیکلوں کے لیے علیحدہ سے ایک لین تعمیر کی جا رہی ہے اس بات کا باقاعدہ اعلان وزیراعلٰی پنجاب مریم نواز شریف نے اپنے سوشل میڈیا اکاؤنٹس پر منگل کی شام کیا۔

ابتدائی طور پر یہ علیحدہ لین فیروزپور روڈ پر بنائی جا رہی ہے، یہ لاہور کی سب سے گنجان اور طویل سڑک ہے جو شاہدرہ کو قصور سے ملاتی ہے۔ 

مریم نواز نے اپنے سوشل میڈیا اکاؤنٹس پر اس نئی لین کی ایک ویڈیو بھی جاری کی ہے جس میں دیکھا جا سکتا ہے کہ ایک پوری لین کو نیلا رنگ کیا جا رہا ہے اور باقی سڑک سے ہٹ کر اس پر ایک ڈیوائڈر بھی بنایا جا رہا ہے یعنی جو لوگ اس لین پر سفر کریں گے وہ باقی سڑک پر نہیں جا سکیں گے۔ 

اس سے پہلے لاہور میں موٹر سائیکلوں اور سائیکلوں کے لیے علیحدہ لین تو موجود ہے لیکن اس پر عملدرامد نہیں ہوتا کیونکہ ڈیوائڈر نہ ہونے کی وجہ سے عام طور پر موٹر سائیکل سوار لین کی پابندی نہیں کرتے یہ پہلی مرتبہ ہے کہ موٹر سائیکل سواروں کے لیے سڑک ہی الگ کی جا رہی ہے۔

بلوچستان میں ینگ ڈاکٹروں کے احتجاج سے مریضوں کو مشکلات

زین الدین احمد، اردو نیوز ۔ کوئٹہ

بلوچستان کے ینگ ڈاکٹرز ایسوسی ایشن کی جانب سے صوبہ بھر کے سرکاری ہسپتالوں کی او پی ڈیز اور آپریشن تھیٹرز کا بائیکاٹ جاری ہے جس کی وجہ سے مریضوں کو مشکلات کا سامنا ہے۔

یہ احتجاج ینگ ڈاکٹر ایسوسی ایشن کے صدر ڈاکٹر بہار شاہ اور دیگر ڈاکٹروں کی گرفتاری کے خلاف کیا جارہا ہے جنہیں گزشتہ دنوں ڈی جی ہیلتھ پر حملے کے الزام میں پولیس نے گرفتار کیا۔

ینگ ڈاکٹر ایسوسی ایشن کے ترجمان ڈاکٹر صبور کاکڑ کے مطابق وائی ڈی اے اور گرینڈ ہیلتھ الائنس پچھلے کئی مہینوں سے سرکاری ہسپتالوں کی نجکاری ، محکمہ صحت میں بد عنوانی کے خلاف اور ہسپتالوں میں سہولیات کی فراہمی کے خلاف احتجاج کررہا ہے ۔ حکومت ان مسائل کو کرنے کے لئے مختلف حربے استعمال کرکے دبانے کی کوشش کر رہی ہے۔

دوسری جانب حکومت نے ہڑتال کرنےوالوں کے خلاف کارروائی نہ کرنے اور او پی ڈیز نہ کھولنے کی پاداش میں صوبے کے سب سے بڑے ہسپتال میں شامل کوئٹہ کے سول ہسپتال کے میڈیکل سپرنٹنڈنٹ ڈاکٹر نور اللہ موسیٰ خیل کو معطل کردیا جبکہ ژوب، قلعہ عبداللہ ا ور قلعہ سیف اللہ کے ہسپتالوں کے سربراہان کو شوکاز نوٹسز جاری کر دیے۔

صوبائی وزیر صحت بخت محمد کاکڑ کا کہنا ہے کہ محکمہ صحت لازمی سروسز میں آتا ہے جس میں ہڑتال پر عدالت نے پابندی لگائی ہے۔ عدالت کی خلاف ورزی کرنے والوں کے خلاف کارروائی کی جائے گی۔ 

قومی اسمبلی اور سینیٹ کے اجلاس آج

پاکستان کی پارلیمنٹ کے دونوں ایوانوں کے اجلاس آج ہو رہے ہیں۔

اسلام آباد سے اردو نیوز کے نامہ نگار صالح عباسی کے مطابق قومی اسمبلی اور سینیٹ کے اجلاس آج ہو رہے ہیں۔

سپیکر ایاز صادق کی زیر صدارت قومی اسمبلی کا اجلاس قومی اسمبلی سیکٹریٹ کے مطابق سہ پہر 2 بجے ہو گا۔ جبکہ سید یوسف رضا گیلانی کی زیر صدارت سینیٹ کا صبح 11 بجے شیڈول ہے۔

سپریم کورٹ اور انسداد دہشتگردی کی عدالت میں مقدمات کی سماعت

سپریم کورٹ میں فوجی عدالتوں میں سویلنز کے ٹرائل کے کیس کی سماعت جاری ہے آج ہونے والی سماعت میں بھی وزارت دفاع کے وکیل خواجہ حارث اپنے دلائل جاری رکھیں گے۔

دوسری جانب اڈیالہ جیل میں جی ایچ کیو حملہ کیس کی بھی سماعت جاری ہے کیس کی سماعت انسداد دہشتگری کی عدالت کے جج امجد علی شاہ کر رہے ہیں۔