لائیو: جب تک جوڈیشل کمیشن نہیں بنے گا مذاکرات میں نہیں بیٹھیں گے: عمر ایوب

یہ لائیو پیج مزید اپڈیٹ نہیں کیا جا رہا ہے

اہم نکات:

• چین کی الیکٹرک گاڑیوں کے پلانٹ کے لیے 25 کروڑ ڈالر کی سرمایہ کاری

• قومی اسمبلی کا اجلاس، دوسرے روز بھی اپوزیشن کا احتجاج

• اسلام آباد میں شاہراہِ دستور پر سرکاری ملازمین کا دھرنا

• پتنگ بازی، ون ویلنگ اور ہوائی فائرنگ غیر شرعی قرار

• جسٹس (ر) فقیر محمد کھوکھر لاپتا افراد کمیشن کے نئے سربراہ مقرر

• بینچز کے اختیار کا کیس، خواجہ حارث اور احسن بھون عدالتی معاون مقرر

پاکستان تحریک انصاف (پی ٹی آئی) کی مذاکراتی کمیٹی کے سربراہ اور اپوزیشن لیڈر عمر ایوب نے کہا ہے کہ ’جب تک جوڈیشل کمیشن نہیں بنے گا، پی ٹی آئی چوتھے مذاکراتی اجلاس میں نہیں بیٹھے گی۔‘

عمر ایوب نے بدھ کو میڈیا سے گفتگو کرتے ہوئے کہا کہ ’ہم واضح کر چکے ہیں کہ چوتھے اجلاس میں شرکت جوڈیشل کمیشن کے قیام میں پیش رفت سے مشروط ہے۔‘

انہوں نے کہا کہ ’حکومت بھلے اجلاس میں بیٹھ کر ڈگڈگی بجائے، ہمیں مذاکراتی اجلاس کی نئی تاریخ سے تاحال آگاہ نہیں کیا گیا۔‘

 پیکا ایکٹ ترمیمی بل، اتھارٹی سوشل میڈیا پلیٹ فارم کے خلاف کارروائی کرے گی

وفاقی حکومت نے پیکا ایکٹ ترمیمی بل 2025 قومی اسمبلی میں پیش کر دیا ہے جس کے مطابق سوشل میڈیا پر جعلی خبریں پھیلانے والوں کو 3 سال قید یا 20 لاکھ روپے جرمانہ یا اُنہیں دونوں سزائیں دی جائیں گی۔

بدھ کو پیش کیے جانے والے بل کے مطابق خلاف ورزی پر اتھارٹی سوشل میڈیا پلیٹ فارم کے خلاف تادیبی کارروائی کی مجاز ہو گی۔

بل کی نئی شق 1 اے کے تحت سوشل میڈیا پروٹیکشن اینڈ ریگولیٹری اتھارٹی قائم کی جائے گی۔ اتھارٹی سوشل میڈیا پلیٹ فارمز کی رجسٹریشن کی منسوخی، معیارات کے تعین کی مجاز ہو گی۔

بل کے مطابق اتھارٹی متعلقہ اداروں کو سوشل میڈیا سے غیر قانونی مواد ہٹانے کی ہدایت جاری کرنے کی مجاز ہو گی۔

چین کی الیکٹرک گاڑیوں کے پلانٹ کے لیے 25 کروڑ ڈالر کی سرمایہ کاری

چین کا اے ڈی ایم گروپ پاکستان میں الیکٹرک گاڑیوں کا مینوفیکچرنگ پلانٹ لگانے کے لیے 25 کروڑ ڈالر کی سرمایہ کاری کرے گا۔

ریڈیو پاکستان کے مطابق ’چینی کمپنی اے ڈی ایم گروپ نے پاکستان میں الیکٹرک گاڑیوں کی مینوفیکچرنگ کا پلانٹ لگانے کے لیے 25 کروڑ ڈالر کی سرمایہ کاری کا اعلان کیا ہے، یہ اقدام خصوصی سرمایہ کاری سہولت کونسل کی کوششوں کا حصہ تھا جو گذشتہ سال قائم کی گئی تھی۔‘

’الیکٹرک گاڑیوں پر منتقلی سے ایندھن کی درآمدی لاگت میں کمی کی توقع ہے، جس سے اربوں ڈالر کی بچت ہوگی۔‘

قومی اسمبلی کا اجلاس، دوسرے روز بھی اپوزیشن کا احتجاج

اسلام آباد میں سپیکر قومی اسمبلی سردار ایاز صادق کی سربراہی میں قومی اسمبلی کا اجلاس دوسرے روز بھی جاری ہے، جبکہ اپوزیشن کی جماعت تحریک انصاف نے آج بھی احتجاج کرتے ہوئے حکومت کے خلاف نعرے بازی کی ہے۔

سپیکر نے اپوزیشن لیڈر عمر ایوب خان کو پوائنٹ آف آرڈر پر بات کرنے کی اجازت نہ دی جس پر پی ٹی آئی اراکین نے احتجاج کرتے ہوئے ایوان سے واک آؤٹ کیا اور نعرے بازی کی۔

گذشتہ روز اجلاس میں شرکت کے لیے وزیراعظم شہباز شریف اسمبلی پہنچے تو اپوزیشن ارکان نے ان کے خلاف نعرے بازی شروع کر دی۔ جبکہ حکومتی ارکان وزیراعظم کی نشست کے گرد حصار بنا کر کھڑے ہو گئے۔

افغان سرحد سے غیرملکی اسلحے کی کھیپ پاکستان میں سمگل کرنے کی کوشش ناکام

پاکستان اور افغانستان کی سرحد پر سکیورٹی فورسز نے غیرملکی اسلحے کی بڑی کھیپ پاکستان میں سمگل کرنے کی کوشش ناکام کر دی ہے۔

بدھ کو سرکاری ذرائع نے کہا کہ ’سکیورٹی فورسز نے 8  جنوری کو پاکستان افغانستان سرحد سے متصل غلام خان بارڈر ٹرمینل پر اسلحہ بردار ٹرک قبضے میں لیا تھا۔ ٹرک سے جدید ساخت کا غیر ملکی اسلحہ اور میگزین برآمد کر لیے  گئے۔‘

ذرائع کا کہنا ہے کہ ’برآمد کیا گیا اسلحہ ٹرک میں ڈرائیور کیبن میں خفیہ مقام پر چھپایا گیا تھا۔ کمپارٹمنٹس بنانے اور سامان کی پیکنگ افغانستان میں ہوئی۔ یہ برآمد شدہ ہتھیار اور گولہ بارود پاکستان میں دہشت گردی کے لیے استعمال کیے جانے والے تھے۔‘

اسلام آباد میں شاہراہِ دستور پر سرکاری ملازمین کا دھرنا

اسلام آباد میں شاہراہِ دستور پر کیبنٹ بلاک چوک میں وفاقی سرکاری ملازمین نے دھرنا دیا ہے جبکہ مظاہرین کو پارلیمنٹ ہاؤس تک جانے سے روکنے کے لیے پولیس کی بھاری نفری تعینات کی گئی ہے۔

سرکاری ملازمین کے مطالبات ہیں کہ ’وفاقی سرکاری اداروں کے ملازمین کی تنخواہوں میں تفریق ختم کی جائے، صوبائی طرز پر تمام وفاقی ملازمین کی اپگریڈیشن بمہ مراعات کی جائے، لیو انکیشمنٹ اور وفاقی ملازمین کی پینشن اصلاحات واپس لی جائیں۔‘

پتنگ بازی، ون ویلنگ اور ہوائی فائرنگ غیر شرعی قرار

پاکستان میں علما نے ہوائی فائرنگ، پتنگ بازی اور ون ویلنگ کو غیر شرعی قرار دیا ہے اور کہا ہے کہ ہر وہ عمل جو جان کو خطرے میں ڈالے غیر شرعی ہے۔

بدھ کو لاہور میں جامعہ نعیمیہ کی جانب سے جاری پریس ریلیز کے مطابق ’ہوائی فائرنگ، پتنگ بازی، ون ویلنگ جیسے جان لیوا کھیل اسلام میں سخت ممنوع ہیں۔‘

جسٹس (ر) فقیر محمد کھوکھر لاپتا افراد کمیشن کے نئے سربراہ مقرر

سپریم کورٹ میں لاپتا افراد سے متعلق کیس کی سماعت کے دوران حکومت نے عدالت کو آگاہ کیا ہے کہ جسٹس (ر) فقیر محمد کھوکھر کو لاپتا افراد کمیشن کا نیا سربراہ مقرر کیا گیا ہے۔

بدھ کو سماعت کے دوران ایڈیشنل اٹارنی جنرل نے عدالت کو آگاہ کیا کہ حکومت نے جسٹس ریٹائرڈ جاوید اقبال کی جگہ نیا سربراہ تعینات کر دیا ہے اور حکومت لاپتا افراد کے معاملے کے حل کے لیے قانون سازی کے ذریعے ایک خصوصی ٹربیونل قائم کرنا چاہتی ہے۔

سپریم کورٹ میں بینچز کے اختیار کا کیس، خواجہ حارث اور احسن بھون عدالتی معاون مقرر

بینچز کے اختیار اور ایڈیشنل رجسٹرار کے خلاف توہین عدالت کیس کی سپریم کورٹ میں سماعت ہوئی جس کے دوران جسٹس منصور علی شاہ نے خواجہ حارث اور احسن بھون کو عدالتی معاون مقرر کیا ہے۔

بدھ کو ہونے والی سماعت میں اٹارنی جنرل منصور عثمان اعوان عدالت میں پیش ہوئے جبکہ عہدے سے ہٹائے جانے والے ایڈیشنل رجسٹرار نذر عباس بھی عدالت میں پیش ہوئے۔ عدالت نے ایڈیشنل رجسٹرار کو تحریری جواب دینے کی ہدایت کر دی۔

جسٹس منصور علی شاہ نے ایڈیشنل رجسٹرار سے پوچھا کہ ’آپ نے کیس کو کیوں ہٹایا کاز لسٹ سے، آپ اپنا تحریری جواب جمع کروا دیں۔‘

بینچز کے اختیار کے کیس میں اٹارنی جنرل نے عدالتی معاونین مقرر کرنے پر اعتراض کرتے ہوئے کہا کہ جو عدالتی معاونین مقرر کیے گئے وہ 26ویں ترمیم کے خلاف درخواست گزاروں کے وکلا ہیں جس پر عدالت نے خواجہ حارث اور احسن بھون کو عدالتی معاون مقرر کر دیا۔

اربوں روپے کا نقصان انٹرنیٹ کی سست روی اور فائر وال سے ہو رہا ہے: ممبر قائمہ کمیٹی

قومی اسمبلی قائمہ کمیٹی آئی ٹی اینڈ ٹیلی کام کے اجلاس میں ممبر کمیٹی شیر ارباب نے کہا کہ ملک کو اربوں روپے کا نقصان انٹرنیٹ کی سست روی اور فائر وال سے ہو رہا ہے۔

بدھ کو امین الحق کی زیرِ صدارت قومی اسمبلی قائمہ کمیٹی برائے آئی ٹی اینڈ ٹیلی کام کے اجلاس میں شیر ارباب نے کہا کہ ’اسلام آباد میں آپ پہلے انٹرنیٹ کی سپیڈ کو چیک کریں، ایک طرف ڈیجیٹل کی باتیں کر رہے ہیں، دوسری طرف انٹرنیٹ کا حال چیک کریں۔‘

کمیٹی ممبر عمر ایوب کا کہنا تھا کہ ’شارک مچھلیوں نے کاٹ کاٹ کر انٹرنیٹ کیبل کا ستیاناس کردیا ہے۔‘

بلوچستان میں ڈاکٹرز نے حکومت سے مذاکرات کے بعد ہڑتال ختم کر دی: ترجمان

ترجمان حکومت بلوچستان نے کہا ہے کہ ڈاکٹرز نے حکومت سے معاملات طے پا جانے کے بعد ہڑتال ختم کر دی ہے۔

بدھ کو ترجمان حکومت بلوچستان شاہد رند نے کہا کہ بلوچستان حکومت، ڈاکٹرز، محکمہ صحت اور ہڑتالی ڈاکٹرز، پیرا میڈیکس اور تمام کیٹیگریز کے ہڑتالی ملازمین کے مابین معاملات خوش اسلوبی سے طے پا گئے ہیں۔

’یقین دہانی کرائی گئی ہے کہ مستقبل میں ہر طرح کی ہڑتال و احتجاج سے اجتناب کیا جائے گا، محکمہ صحت کے ملازمین کے  جائز مطالبات کے لیے ایک مربوط طریقہ کار کے تحت کام کیا جائے۔‘

پاکستان کا سب سے بڑا مسئلہ کرنٹ اکاؤنٹ اور فسکل اکاؤنٹ خسارہ ہے، وزیر خزانہ

وزیر خزانہ سینیٹر محمد اورنگزیب نے کہا ہے کہ پاکستان کا سب سے بڑا مسئلہ کرنٹ اکاؤنٹ اور فسکل اکاؤنٹ کا جڑواں خسارہ ہے، اور فسکل خسارے کی سب سے بڑی وجہ 9 سے 10 فیصد غیر پائیدار ٹیکس ٹو جی ڈی پی شرح ہے۔

بدھ کو وزارت خزانہ کی جانب سے جاری پریس ریلیز کے مطابق وزیر خزانہ سینیٹر محمد اورنگزیب نے ورلڈ اکنامک فورم کے دوران ترقی پذیر معیشتوں پر عالمی قرضوں کے بڑھتے بوجھ کے موضوع پر اعلیٰ سطحی مذاکرے سے بطور پینلسٹ خطاب کیا۔

ان کا کہنا تھا کہ ’ڈھانچہ جاتی اصلاحات کے باعث ٹیکس ٹو جی ڈی پی شرح کو 13 فیصد تک لے جانے کی کوشش جاری ہے، ٹیکس ٹو جی ڈی پی شرح بڑھائے بنا قوموں کا برادری میں باعزت مقام کا حصول نا ممکن ہے۔‘