بیان میں کہا گیا ’دونوں ملکوں کے درمیان دوطرفہ تعلقات کے پہلووں اور مختلف شعبوں میں انہیں بڑھانے اور ترقی دینے کے طریقوں کا جائزہ لیا گیا۔‘
علاقائی اور بین الاقوامی صورتحال، سلامتی و استحکام کے حصول کے لیے کی جانے والی کوششوں پر بھی بات چیت ہوئی ہے۔
اس موقع پر امریکہ میں سعودی سفیر شہزادی ریما بنت بندر سلطان بن عبدالعزیز، وزیر خارجہ شہزادہ فیصل بن فرحان، وزیر مملکت اور کابینہ کے رکن قومی سلامتی کے مشیر ڈاکٹر مساعد بن محمد العبیان اور ولی عہد کے سیکرٹری شہزادہ ڈاکٹر بندر بن عبید الرشید بھی موجود تھے۔
امریکی وفد میں امریکی قومی سلامتی کے مشیر، امریکی سفارتخانے کی ناظم الامور، امریکی ایلچی برائے مشرق وسطی اور دیگر عہدیدار بھی شریک تھے۔
قبل ازیں امریکی وزیر خارجہ نے سعودی ہم منصب شہزاددہ فیصل بن فرحان سے ملاقات کی۔
سعودی اور امریکی وزرائے خارجہ نے ملاقات کے دوران امریکہ اور سعودی عرب کے تعلقات اور انہیں بڑھانے کے طریقوں کا جائزہ لیا۔
انہوں نے علاقائی اور بین الاقوامی صورتحال اور اس حوالے سے کی جانے والی کوششوں پر بھی تبادلہ خیال کیا۔
امریکہ میں سعودی سفیر شہزادی ریما اور وزیر خارجہ بھی موجود تھے (فوٹو: ایس پی اے)
مارکو روبیو اسرائیل کے دورے کے بعد سعودی عرب پہنچے ہیں جو منصب سنبھالنے کے بعد ان کا پہلا دورہ مشرق وسطی ہے، اگلے مرحلے میں وہ متحدہ عرب امارات جائیں گے۔
علاوہ ازیں امریکہ کے قومی سلامتی کے مشیر مائیک والٹز اور مشرق وسطی کےلیے خصوصی ایلچی سٹیو وٹ کوف بھی ریاض پہنچے ہیں۔
عرب نیوز کے مطابق مارکو روبیو یوکرین پر ماسکو کے حملے کے خاتمے کے لیے آنے والے دنوں میں امریکی اور روسی حکام کے درمیان براہ راست مذاکرات کی تیاری کے لیے ایک وفد کی سعودی عرب میں قیادت کر رہے ہیں۔
یہ دورہ صدر ڈونلڈ ٹرمپ اور روسی صدر ولادیمیر پوٹن کے درمیان گزشتہ ہفتے کی ٹیلی فونک گفتگو کے بعد ہو رہا ہے، جس میں ٹرمپ نے کہا تھا کہ ہماری متعلقہ ٹیمیں فوری طور پر مذاکرات شروع کرنے پر راضی ہیں۔
سعودی ولی عہد سے ریاض میں جرمنی کے صدر کی ملاقاتNode ID: 885379
