امارات میں 9 ہفتوں کے دوران سونے کی قیمت میں 40 درھم فی گرام کا اضافہ

متحدہ عرب امارات میں دبئی اور شارجہ کی گولڈ مارکیٹوں میں گزشتہ 9 ہفتوں سے سونے کی قیمت میں اضافے کا سلسلہ جاری ہے۔

گزشتہ ایک ہفتے کے دوران سونے کے مختلف قیراط فی گرام کے نرخوں میں 75 فلس سے ایک درھم کے درمیان اضافہ ریکارڈ کیا گیا۔

گزشتہ 9 ہفتوں کے دوران سونے کی فی گرام قیمت میں 40.75 درھم تک کا اضافہ ہوچکا ہے۔

شورومز مالکان کا کہنا ہے لوگ مستقبل میں سونے کے نرخوں میں متوقع اضافے کے پیش نظر بچت کےلیے خریداری کر رہے ہیں۔

ایک گولڈ شوروم کے ڈائریکٹر کا کہنا تھا سونے کی قیمتوں میں مسلسل اضافے کا طویل ترین سلسلہ ریکارڈ کیا گیا ۔ کچھ  لوگ 9 ہفتوں کے دوران ہونے والے 40 درھم فی گرام کے اضافے کو کیش کرا رہے ہیں اور مستقبل کے لیے بھی خریداری کررہے ہیں۔

ایک جیولری شاپ کے مینجر کا کہنا تھا  اس وقت سونے کے نئے زیورات کی خریداری اور مانگ سست ہے۔سونے کی قیمت میں حد سے زیادہ اضافہ ہوچکا ہے۔ ہر روز قیمت بڑھتی ہی جارہی ہے۔

گولڈ اینڈ جیولری کمپنی کے ڈائریکٹر کا کہنا تھا گزشتہ کئی ہفتوں سے سونے کی قیمت میں اضافہ ہی ہورہا ہے جو ایک ریکارڈ ہے ماضی میں ایسا نہیں ہوا جس کی وجہ سے مارکیٹ میں خریداری نہ ہونے کے برابر ہے۔

ایک جیولری شوروم کے سیلز مینجر کا کہنا تھا اس وقت نئے زیورات کی مانگ زیادہ تر سیاحوں تک محدود ہے جو زیورات تحائف میں دینے کے لیے خریداری کرنے مارکیٹ آرہے ہیں۔

امارات میں گزشتہ ایک ہفتے کے دوران 24 قیراط ایک گرام کے نرخ 353.75 درھم رہے جس میں ایک درہم کا اضافہ ریکارڈ کیا گیا۔

22 قیراط کے نرخ بھی ایک درھم اضافے سے 329.25 درھم ہوچکے ہیں۔

21 قیراط کے نرخ 75 فلس اضافے کے بعد 315.50 درھم ہوگئے۔ اسی طرح 18 قیراط فی گرام کی قیمت 270.50 درھم  ہے۔ایک ہفتے میں 75 فلس کا اضافہ ہوا ہے۔