مکہ کے حرا کلچرل ڈسٹرکٹ میں قرآن میوزیم کا افتتاح

مکہ مکرمہ ریجن کے نائب گورنر شہزادہ سعود بن مشعل بن عبدالعزیز نے مکہ مکرمہ کے حرا کلچرل ڈسٹرکٹ کے ایگزیبیشن سینٹر میں قرآن کریم میوزیم کا افتتاح کردیا۔

سعودی خبررساں ایجنسی ’ایس پی اے‘ کے مطابق قرآن کریم میوزم کے افتتاح کے موقع پرڈپٹی گورنر کے ہمراہ دیگر اعلی عہدیدار اور شاہی شخصیات بھی موجود تھیں۔

قرآن کریم میوزیم کی تیاری میں جدید ترین ٹیکنالوجی کا استعمال کیا گیا ہے جس کی نگرانی مکہ مکرمہ اور مشاعرمقدسہ رائل کمیشن نے کی۔

میوزیم میں قدیم قلمی نسخوں کے علاوہ تاریخی قرآن کریم کے نادر و نایاب  نسخے بھی رکھے گئے ہیں۔

زائرین کی دلچسپی کے لیے میوزیم میں قرآن کریم کی طباعات کے بارے میں بھی مکمل معلومات فراہم کی جائیں گی جنہیں تصاویر اور دستاویزی فلموں کے ذریعے پیش کیا جائے گا۔

رمضان کے دوران میوزیم زائرین کے لیے ہمہ وقت کھلا رہے گا جس کے ذریعے انہیں تاریخی نادر قلمی نسخوں کے بارے میں اہم معلومات فراہم کی جائیں گی۔