رمضان میں ٹرک ڈرائیوروں کے اوقاتِ کار میں کمی

ٹرانسپورٹ جنرل اتھارٹی نے رمضان المبارک کے دوران ہیوی ٹرکس ڈرائیوروں کے اوقاتِ کار میں کمی کرتے ہوئے ایک دن میں 9 گھنٹے سے زیادہ ڈرائیونگ نہ کرنے کی ہدایت کی ہے۔

اخبار 24 کے مطابق اتھارٹی کا کہنا ہے کہ کمپنیوں کی انتظامیہ قوانین پر سختی سے عمل کریں ۔ ٹرک ڈرائیوروں سے یومیہ 9 گھنٹے سے زیادہ ڈرائیونگ نہ کرائی جائے۔ انتہائی ضرورت پڑنے پر دورانیہ 10 گھنٹے  ہفتے میں صرف 2 بار کیا جاسکتا ہے۔

اتھارٹی کا مزید کہنا تھا کہ ایک ہفتے میں ڈرائیوروں کے کام کا دورانیہ 56 گھنٹے سے زیادہ نہ ہو۔ ضوابط میں مزید کہا گیا ہے کہ مسلسل 4 گھنٹے ڈرائیونگ کے بعد 45 منٹ آرام کرنا ضروری ہوگا جبکہ 24 گھنٹے کے مرحلہ وار ڈرائیونگ کے بعد 11 گھنٹے آرام کے ہوں گے۔

ٹرانسپورٹ اتھارٹی نے ٹرکوں کو روڈ پر لانے سے قبل ان کا فنی معائنہ کرانے کی بھی ہدایت کی ہے جن میں ہیڈ اور بیک لائٹس ، سائیڈ مرر ، بریکس اور دیگر حفاظتی سسٹم شامل ہے۔

اتھارٹی کا کہنا تھا کہ حفاظتی اقدامات کے تحت ڈرائیوروں کو آرام کرنے کے ضوابط مقرر کیے ہیں جن پر عمل کرنا ہر ٹرانسپورٹ کمپنی کے لیے ضروری ہے ۔

ٹرانسپورٹ اتھارٹی نے ٹرک ڈرائیوروں اور ٹرانسپورٹ سے متعلق افراد سے کہا ہے کہ وہ کسی بھی خلاف ورزی کی صورت میں ٹول فری نمبر 19929 پر اطلاع دے سکتے ہیں۔