تعطیلات کا لطف دوبالا کرنے کے لیے سیاح املج کا رخ کرنے لگے

جزائر املج مچھلیوں، رنگ برنگے مونگوں اور کھلے گہرے سمندر میں غوطہ خوری کے شائق سیاحوں کی دلچسپی کا مرکز بنے ہوئے ہیں-

العربیہ نیٹ کے مطابق املج کے ساحل رنگا رنگ سیاحت والی خوبیوں سے مالا مال ہیں- یہاں آرام و راحت کے متلاشی افراد کے لیے بہت کچھ ہے- سمندر کے قدرتی مناظر سے دلچسپی رکھنے والے یہاں آنا پسند کرتے ہیں- مہم جوئی کے شائقین بھی یہاں کثیر تعداد میں پہنچ رہے ہیں- جمالیاتی مناظر کی فوٹو گرافی کرنے والوں کے لیے بھی یہاں کافی کچھ ہے-  

جزائر املج کے ساحل سعودی عرب کے شمال مغرب میں واقع ہیں- مملکت کے مختلف علاقوں سے مقامی شہری اور مقیم غیرملکی موسم گرما کی تعطیلات گزارنے کے لیے یہاں آنا پسند کرتے ہیں- بیرون مملکت کے سیاح بھی یہاں آ رہے ہیں- ہر سال سیاحوں کی تعداد بڑھ رہی ہے- املج کے ساحلوں سے متعلق مطلوبہ معلومات آسانی سے  مہیا ہو جاتی ہے- یہاں پہنچنا آسان ہے مشکل نہیں- 

صبح سویرے الحرۃ بندرگاہ سے سیاحوں کی کشتیاں جزائر املج کے  لیے روانہ ہوتی ہیں- یہ زیادہ مشہور ہیں- یہ آس پاس واقع متعدد جزیروں کا مجموعہ ہے- یہ بحراحمر املج کے 103 جزیروں کا حصہ ہیں- ٹورسٹ گائیڈ اور آرام و راحت کے وسائل سے آراستہ کشتیوں سے ان جزیروں کی سیر بڑا مزہ دیتی ہے- 

عام طور پر جزیروں کی سیاحت کے لیے آنے والے ناشتہ کشتیوں میں کرنا پسند کرتے ہیں- یہاں انہیں انواع و اقسام کے مشروبات، پانی، قہوہ، چائے، سینڈوچ اور پھل ملتے ہیں- 

کشتی سب سے پہلے جزیرہ ام الملک پر لنگر انداز ہوتی ہے- یہ الحرۃ بندرگاہ سے تقریبا آٹھ کلومیٹر کے فاصلے پر واقع ہے- یہاں آنے والوں کو مینگروف کے درختوں کا منظر بھلا لگتا ہے- اس جزیرے میں مختلف مقامات سے ہجرت کرنے والے پرندوں کے جھنڈ نظر آتے ہیں- یہ منظر بھی پیارا لگتا ہے- یہاں سے کشتیاں جزایۃ اور اطاویل جزیروں کا رخ کرتی ہیں جو ریتیلے ساحل سے جڑے ہوئے ہیں- ام سحر جزیرے میں ڈولفن کثیر تعداد میں تیرتی نظر آتی ہیں- کشتی پر سوار سیاح ریت سے نکل کر سمندر کی طرف جاتے ہوئے کچھوے دیکھ سکتے ہیں- جزیرہ ام جلوف کے ساحل پر تیراکی کا اپنا ایک لطف ہے-

جزائر املج کے سیاح کھلے گہرے سمندر میں تیراکی کے دوران رنگ برنگے مونگوں اور مچھلیوں کے پرکشش مناظر سے لطف اٹھا سکتے ہیں- جزائر کی سیر کا اختتام بندرگاہ کے قریب واقع ریستوران میں سمندری کھانوں سے کیا جا سکتا ہے- جہاں تازہ مچھلیاں اور مقامی انداز میں تیار کردہ سمندری ڈشیں دستیاب ہوتی ہیں- سیاح ’روح السعودیہ‘ پلیٹ فارم  https://www.visitsaudi.com/ar کے ذریعے بکنگ کرا سکتے ہیں- 

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں