مدینہ منورہ: غیرقانونی طور پر درخت کاٹنے پر شہری گرفتار

تحفظ ماحولیات فورس نے مدینہ منورہ ریجن میں غیرقانونی طور پر درخت کاٹنے کے الزام میں سعودی شہری کو حراست میں لے کر اس کے خلاف مقدمہ درج کرلیا۔

سعودی خبررساں ایجنسی ’ایس پی اے‘ کے مطابق تحفظ ماحولیات فورس کی ٹیموں نے میدانی علاقے میں درختوں کو کاٹنے پر ایک شہری کو گرفتار کیا جو ضوابط کی خلاف ورزی کرتے ہوئے ممنوعہ علاقے میں لگے درخت کاٹ کر لکڑیاں فروخت کرتا تھا۔

دریں اثنا ادارہ تحفظ ماحولیات کا کہنا تھا کہ مملکت میں سبزے کو نقصان پہنچانے اور درختوں کو کاٹنے پر سزا مقرر ہے۔ غیرقانونی طورپر درخت کاٹے جانے کی صورت میں فی درخت 20 ہزار ریال جرمانہ مقرر ہے ۔

ادارہ تحفظ ماحولیات کی جانب سے شہریوں اور غیرملکیوں سے اپیل کی گئی ہے کہ وہ ادارے کے ساتھ تعاون کریں اور سبزے کے تحفظ کے لیے مناسب اقدامات میں ان کا ساتھ دیں۔

 ضوابط کی خلاف ورزی کرنے والوں کے بارے میں مکہ مکرمہ، ریاض اور مشرقی ریجن میں ٹول فری نمبر 911 جبکہ مملکت کے دیگر علاقوں کے لیے 999 یا 996 پر اطلاع دی جاسکتی ہے۔