امریکہ : شیر خوار کو گاڑی میں تنہا چھوڑنے والی سعودی فیملی کی تلاش

ریاض۔۔۔۔امریکی ریاست ٹیکساس کی پولیس نے 8ماہ کی بچی کی زندگی کو خطرے سے دوچار کرنے والی سعودی فیملی کی گرفتاری کا حکم جاری کردیا۔ امریکی میڈیاکے مطابق ٹیکساس کے مقام پر ایک سعودی جوڑا 8ماہ کی بچی کو گاڑی میں تنہا چھوڑ کر فلم دیکھنے چلا گیا تھا۔ راہ گیر نے بچی کو گاڑی میں تنہا دیکھ کر رپورٹ کردی تھی۔ پولیس نے گاڑی کا دروازہ کھول کر شیر خوار کو برآمد کرکے طبی معائنہ کرایا اور والدین کی تلاش شروع کردی۔ اسی دوران میاں بیوی سنیما گھر سے گاڑی کے پاس پہنچ گئے۔ دونوں نے کہا کہ ہمارے یہاں بچوں کو گاڑی میں چھوڑ کر چلے جانا معمول کی بات ہے۔ ہم نے سوچا امریکہ میں بھی ایسا ہی ہوتا ہوگا۔ سپاہی نے دونوں کا بیان ریکارڈ کرکے انہیں جائے وقوعہ سے روانگی کی اجازت دیدی۔ طبی معائنے سے بھی ثابت ہوگیا تھا کہ بچی بخیریت ہے۔ ابلاغی رپورٹ میں بتایا گیا ہے کہ سی سی کیمروں کے معائنوں سے پتہ چلا کہ میاں بیوی اپنی بچی کو 45منٹ تک اکیلا چھوڑ کر گئے تھے۔ اس پر دونوں کی گرفتاری، طبی معائنے اور بچی کو تنہا چھوڑ کر جانے کی بابت تحقیقات کا فیصلہ کیا گیا۔سعودی فیملی مقررہ تاریخ پر حاضر نہیں ہوئی۔