کچھ عرصے دوری کے بعد اداکارہ کی ”ہچکی“ کے ذریعے بالی وڈ میں واپسی
نامور بالی وڈ اداکارہ رانی مکھرجی کو غیر قانونی تعمیرات کے خلاف قانونی نوٹس جاری کردیا گیا۔ اداکارہ کو برہان ممبئی میونسپل کارپوریشن”بی ایم سی“کی جانب سے ہندوستان کے پوش علاقے جوہو میں واقعے بنگلے کی غیر قانونی تعمیر کے خلاف نوٹس جاری کردیا گیا۔ میڈیا کے مطابق رانی مکھرجی نے 2014 میں بی ایم سی سے اپنے بنگلے کرشنا رام کی تعمیر کے لئے منظوری لی تھی۔ اس اجازت کے مطابق رانی مکھرجی کو بنگلے کا تعمیراتی کام ایک سال کے اندر مکمل کرنا تھا لیکن رانی نے اس پر کوئی توجہ نہیں دی اور3 سال گزرنے کے باوجود بنگلے کاکام تاحال جاری ہے۔ رانی مکھر جی نے اپنے بنگلے کی اونچائی میں بھی غیر قانونی اضافہ کیاہے ۔ کام کا جائزہ لینے کے لئے بی ایم سی کی ٹیم نے اداکارہ کے گھر کا دورہ بھی کیا لیکن انہیں گھر کے اندر داخل نہیں ہونے دیا گیا۔اس معاملے پر بی ایم سی کی جانب سے رانی کو سیکشن 488 کے تحت نوٹس جاری کر دیاگیاجس کے مطابق بی ایم سی کی ٹیم 30 اگست کو پولیس کے ہمراہ ایک بار پھر اداکارہ کے گھر کا دورہ کرے گی اور عمارت میں کی گئی غیرقانونی تعمیر کا جائزہ لے گی۔
دوسری جانب اداکارہ کے ترجمان کا کہنا ہے کہ رانی مکھرجی ملک کی ایک عزت دار شہری ہیں ۔ان پر غیرقانونی تعمیرات کا الزام لگانا بے بنیاد اور سمجھ سے بالاتر ہےٹ انہوں نے اداکارہ کو بھیجے جانے والے قانونی نوٹس کی تصدیق کرتے ہوئے کہا کہ بنگلے کی اونچائی میں اضافے کا باقاعدہ اجازت نامہ حاصل کیا گیا تھا۔واضح رہے کہ اداکارہ رانی مکھر جی بیٹی کی پیدائش کے بعد کچھ عرصے کے لئے فلموں سے دور ہوگئی تھیں لیکن اب وہ فلم ”ہچکی“ کے ذریعے ایک بار پھر بالی وڈ میں واپسی کررہی ہیں۔
