شاہ سلمان کیلئے ڈاکٹریٹ کی اعزازی ڈگری

ماسکو..... خادم حرمین شریفین شاہ سلمان بن عبدالعزیز آل سعود کو ماسکو یونیورسٹی کی جانب سے انٹرنیشنل ریلیشنز میں ڈاکٹریٹ کی اعزاز ی ڈگری عطا کی گئی ۔ سعودی خبر رساں ایجنسی کے مطابق اس موقع پر ماسکو یونیورسٹی میں شاندار تقریب منعقد کی گئی ۔ خادم حرمین شریفین شاہ سلمان بن عبدالعزیز جب ماسکو یونیورسٹی پہنچے تو انکا استقبال وزیر تعلیم اور ماسکو یونیورسٹی کے چانسلر پروفیسر آنا تولی ترکانوف نے کیا ۔ تقریب سے خطاب کرتے ہوئے روسی وزیر تعلیم نے کہایہ ہمارے لئے باعث اعزاز ہے کہ ماسکو یونیورسٹی میں خادم حرمین شریفین شاہ سلمان بن عبدالعزیزتشریف لائے ۔ شاہ سلمان کا یہ دورہ تاریخی اہمیت کا حامل ہے جس سے دونوں ملکو ں کے تعلقات مستحکم ہونگے ۔ بعدازاں یونیورسٹی کے چانسلر آنا تولی نے اپنے خطاب میں خادم حرمین شریفین کے دورے کو جامعہ کے لئے اعزاز قرار دیتے ہوئے کہا کہ ماسکو یونیورسٹی میں عربی کلاسو ں کے اجراءکا خصوصی اہتمام کیا جائیگا۔ انہوں نے مزید کہا کہ یونیورسٹی کی لائبریری میں عربی کی متعدد کتب موجود ہیں ۔ خطاب کے بعد چانسلر کی جانب سے شاہ سلمان کو اعزازی ڈگری دینے کا اعلان کیا گیا ۔