گرداس پورمیں کانگریس کی زبردست کامیابی

گرداس پور۔۔۔۔۔کانگریس کے امیدوار سنیل جاکھڑ نےگرداس پور لوک سبھا نشست 193219 ووٹوں سے جیت لی ہے۔ یہ  بالی ووڈ اداکار اور بی جے پی رکن پارلیمنٹ ونود کھنہ کی موت کےبعد خالی ہوئی تھی جہاں 11 اکتوبر کو ووٹ ڈالے گئے تھے۔ یہاں سے بی جے پی کے سورن سلاریا اور عام آدمی پارٹی کے سریش کمار کھجوریا بھی میدان میں تھے۔اس ضمنی انتخاب میں تقریباً 15.22 لاکھ ووٹرزمیں سے 56 فیصد نے اپنے حق رائے دہی کا استعمال کیا تھا۔ 2014 کے لوک سبھا انتخاب میں گرداس پور میں 70 فیصد ووٹنگ ہوئی تھی۔ انتخاب کے نتائج کے مطابق کانگریس کے جاکھڑ کو 4 لاکھ 99 ہزار 752 ووٹ حاصل ہوئے ۔سبکہ سورن سلاریا کو 3 لاکھ 6 ہزار 533 ووٹ ملے۔ دوسری طرف عام آدمی پارٹی کے امیدوار لیفٹیننٹ جنرل (ر )سریش کھجوریا کو محض 23 ہزار 579 ووٹ  ملے اور 7 ہزار 587 لوگوں نے نوٹا کا استعمال کیا۔واضح ہو کہ اپریل میں ونود کھنہ کی وفات بعد یہ لوک سبھا نشست خالی ہوئی تھی۔ گرداس پور پارلیمانی نشست میں 9 اسمبلی حلقے بھووا، پٹھان کوٹ، گرداس پور، دینا نگر، کادیان، فتح گڑھ، چوڑیاں، ڈیرا بابا نانک، سجان پور اور بٹالا شامل ہیں۔گرداس پور نشست جیتنے کے بعد کانگریس کے رہنماؤں اور کارکنان نے گرداس پور ، چنڈی گڑھ سمیت کئی شہروں میں آتشبازی کی اور مٹھائیاں تقسیم کرکے جشن منایا۔اپنی کامیابی پر خوشی کا اظہار کرتے ہوئے  سنیل جاکھڑ نے کہا کہ گرداس پور کے لوگوں نے مودی حکومت کی پالیسیوں پر اپنی ناراضگی کا اظہار کرتے ہوئے سخت پیغام دیا ہے۔پنجاب کے وزیر اعلیٰ کیپٹن امریندر سنگھ نے ٹوئٹ میں کہاکہ گرداس پور کے باشندوں کو  بھروسہ دلاتا ہوں کہ سنیل جاکھڑکی جانب سے کئے گئے وعدے پورےکئے جائیں گےاوربرق رفتاری سے سبھی ترقیاتی منصوبوں کوپایہ تکمیل تک پہنچایا جائے گا۔نوجوت سنگھ سدھو نے کہا کہیہ جیت ہمارے ہونے والے پارٹی  صدر راہل گاندھی کے لئےشاندار تحفہ ہے۔