ٹی ٹوئنٹی سیریز کیلئے 16 رکنی پاکستانی اسکواڈ
لاہور: پاکستان کرکٹ بورڈ نے سری لنکا کے خلاف ٹی ٹوئنٹی سیریز کیلئے 16 کھلاڑیوں کا اعلان کر دیا۔انضمام الحق کی سربراہی میں پی سی بی سلیکشن کمیٹی نے آئی لینڈرز کے خلاف ٹی ٹوئنٹی کے3 میچوں کی سیریز کیلئے اسکواڈ کا اعلان کردیا ہے جس میں کپتان سرفراز احمد، فخر زمان، احمد شہزاد، بابر اعظم، شعیب ملک، محمد حفیظ، عماد وسیم، شاداب خان، محمد نواز، فہیم اشرف، حسن علی، عامر یامین، رومان رئیس، عثمان شنواری اور عمر امین شامل ہیں۔ پیسر محمد عامر کی شمولیت کو فٹنس کلیئرنس سے مشروط کیا گیا ہے۔ ورلڈ الیون کے خلاف ہوم سیریز میں اسکواڈ کا حصہ بننے والے سہیل خان اپنی جگہ برقرار نہیں رکھ سکے جبکہ آرام کرنے والے محمد حفیظ کی واپسی ہوئی ہے۔واضح رہے کہ پاکستان اور سری لنکا کے مابین ٹی ٹوئنٹی سیریز کا آغاز 26 اکتوبر کو ہو گا۔پہلے2میچ 26 اور 27 اکتوبر کو ابوظبی میں کھیلے جائیں گے جبکہ تیسرا اور آخری میچ 29 اکتوبر کو قذافی اسٹیڈیم لاہور میں کھیلا جائے گا۔
